மலிங்கவின் பேஸ்புக்கில் பிரபலமான பைனாசின் இல்லத்துக்குச் சென்ற ரிஷாட்

இலங்கை கிரிக்கெட் அணியின் முன்னாள் அணித்தலைவர் லசித் மலிங்கவின் பேஸ்புக் மூலம், நாடு முழுவதும் அறியப்பட்டஅநுராதபுரம், ஹொரவபொத்தானை, பத்தாவ பிரதேசத்தின் இளம் கிரிக்கெட் வீரர் பைனாஸின் இல்லத்துக்கு பாராளுமன்ற உறுப்பினர் ரிஷாட் பதியுதீன் சனிக்கிழமை (09) விஜயம் மேற்கொண்டதுடன், பைனாஸின் திறமையை பாராட்டி, வாழ்த்தி, ஒரு தொகை பணத்தையும் வழங்கிவைத்தார்.

அத்துடன், பைனாசின் எதிர்கால கல்விச் செயற்பாடுகள் மற்றும் கிரிக்கெட்டில் அவருக்குள்ள ஈடுபாடு, அதீத திறமை குறித்து கேட்டறிந்துகொண்ட பதியுதீன், அவரின் எதிர்கால முன்னேற்றத்துக்கு தன்னால் முடிந்த ஒத்துழைப்புக்களை வழங்குவதாகவும் வாக்குறுதி அளித்தார்.

இதன்போது பைனாசின் பெற்றோர், உறவினர், சக விளையாட்டு வீரர் மற்றும் ஊர்மக்கள் என அனைவரும் அங்கு ஒன்றுகூடியிருந்ததுடன், பதியுதீனுக்கு தங்களது நன்றிகளையும் தெரிவித்துக் கொண்டனர்.