படகு இயந்திரத்தைத் திருடியவர் கைது

தீசான் அஹமட், பதுர்தீன் சியானா

திருகோணமலை குச்சவெளி பொலிஸ் பிரிவுக்குட்பட்ட ஜாயாநகர் கடற்கரையில்  நிறுத்தி வைக்கப்பட்டிருந்த படகு ஒன்றின் படகு இயந்திரத்தை (என்ஜின்) திருடிய குற்றச்சாட்டின்  பேரில், ஜாயாநகரைச் சேர்ந்த நபரொருவரை, நேற்று (21) மாலை கைது செய்துள்ளதாக, குச்சவெளி பொலிஸார் தெரிவித்தனர்.

இவ்வாறு சந்தேகத்தின் பேரில் கைது செய்யப்பட்டவர் புடவைக்கட்டு-செந்தூர் பகுதியைச்சேர்ந்த எம்.கே.சுபைதீன் சித்தீக் (29 வயது) எனவும் அவரிடமிருந்து, இரண்டு இலட்சம் ரூபாய் பெறுமதியான படகு இயந்திரத்தையும் கைப்பற்றியுள்ளதாகவும் பொலிஸார் தெரிவித்தனர்.

படகு சொந்தக்காரரான ரபாய்தீன் வசீர் என்பவரினால், நேற்று காலை குச்சவெளி பொலிஸில் செய்த முறைப்பாட்டை அடிப்படையாக கொண்டு விசாரணைகளை முன்னெடுத்த பொலிஸார், குறித்த நபரை கைது செய்துள்ளனர்.

கைது செய்யப்பட்ட நபரை திருகோணமலை நீதவான் நீதிமன்றத்தில் ஆஜர்படுத்துவதற்கான ஏற்பாடுகளை குச்சவெளி பொலிஸார் மேற்கொண்டுவருகின்றனர்.