அடுத்தாண்டு வரையில் யுனைட்டெட்டில் கவானி

இங்கிலாந்து பிறீமியர் லீக் கழகமான மன்செஸ்டர் யுனைட்டெட்டின் முன்களவீரரான எடின்சன் கவானி, யுனைட்டெட்டில் இருப்பதை நீடித்துள்ளதாக அக்கழகம் உறுதிப்படுத்தியுள்ளது.

அடுத்தாண்டு வரையில் யுனைட்டெட்டில் இருக்கும் வண்ணம் புதிய ஓராண்டு ஒப்பந்தமொன்றில் கவானி கைச்சாத்திட்டுள்ளார்.

பிரெஞ்சு லீக் 1 கழகமான பரிஸ் ஸா ஜெர்மைனிலிருந்து விடுவிக்கப்பட்ட பின்னர் கடந்தாண்டு ஒக்டோபர் மாதத்தில், யுனைட்டெட்டில் கவானி ஒப்பந்தம் செய்யப்பட்டிருந்தார்.

இப்பருவகாலத்தில் 35 போட்டிகளில் 15 கோல்களை கவானி பெற்றிருந்தார்.

கட்டாரில் அடுத்தாண்டு நடைபெறவுள்ள சர்வதேச கால்பந்தாட்ட சம்மேளன உலகக் கிண்ணத் தொடருக்கான உருகுவே குழாமில் இட்டம்பெற எதிர்பார்த்துள்ள கவானிக்கு, பிறீமியர் லீக்கில் தொடருவது உதவுமெனக் கருதப்படுகிறது.