இந்தியா எதிர் இங்கிலாந்து: டெஸ்ட் தொடர் நாளை ஆரம்பிக்கின்றது

இந்திய, இங்கிலாந்து அணிகளுக்கிடையிலான நான்கு போட்டிகள் கொண்ட டெஸ்ட் தொடரானது, சென்னையில் நாளை காலை 9.30 மணிக்கு ஆரம்பமாகவுள்ள முதலாவது டெஸ்டுடன் ஆரம்பமாகின்றது.

சர்வதேச கிரிக்கெட் சபையின் டெஸ்ட் சம்பியன்ஷிப் இறுதிப் போட்டியில் நியூசிலாந்துடன் விளையாடவுள்ள அணியைத் இத்தொடரே தீர்மானிக்கவுள்ளதால் இத்தொடர் அதிக முக்கியத்துவம் பெறுகிறது.

இத்தொடரை குறைந்தது 2-1 எனக் கைப்பற்றினால் இறுதிப் போட்டிக்கு இந்தியா இறுதிப் போட்டிக்குத் தகுதி பெறும். மாறாக இங்கிலாந்து 1-0, 2-0, 2-1 அல்லது இந்தியா 1-0 என இத்தொடரை வென்றால் அவுஸ்திரேலியா இறுதிப் போட்டிக்குத் தகுதிபெறும். இந்நிலையில், இங்கிலாந்து இறுதிப் போட்டிக்குத் தகுதிபெறுவதற்கு குறைந்தது 3-0 என தொடரை வெல்ல வேண்டும்.

இதேவேளை, இத்தொடரை வென்றால் சர்வதேச கிரிக்கெட் சபையின் டெஸ்ட் போட்டிகளுக்கான அணிகளின் தரவரிசையில் முதலிடத்துக்கு இந்தியா முன்னேறும். இங்கிலாந்து, 4-0 என வென்றால் அவ்வணி இரண்டாமிடத்துக்கு முன்னேற இந்தியா நான்காமிடத்துக்கு கீழிறங்கும். 3-1 என இங்கிலாந்து வென்றால் இந்தியா மூன்றாமிடத்துக்கு கீழிறங்கும். 3-0 என இங்கிலாந்து வென்றால், இங்கிலாந்து மூன்றாமிடத்துக்கு முன்னேற, இந்தியா நான்காமிடத்துக்கு கீழிறங்கும். 2-0 என இங்கிலாந்து வென்றால், மூன்றாமிடத்துக்கு இந்தியா கீழிறங்கும்.

இந்தியாவைப் பொறுத்தவரையில், அணித்தலைவர் விராட் கோலி, ரோஹித் ஷர்மா, இரவிச்சந்திரன் அஷ்வின், செட்டேஸ்வர் புஜாரா ஆகியோர் அவ்வணிக்கு முக்கியமானவர்களாக இருப்பார்கள் எனக் கருதப்படுகிறது.

மறுபக்கமாக இங்கிலாந்தைப் பொறுத்தவரையில், அணித்தலைவர் ஜோ றூட், மொயின் அலி உள்ளிட்டோர் முக்கியமானவர்களாகக் காணப்படுகின்றனர்.