இ – 20 உலகக் கிண்ணம்: சம்பியனானதால் இந்தியாவின் முதல்கள்

சர்வதேச கிரிக்கெட் சபையின் இருபதுக்கு – 20 உலகக் கிண்ணத் தொடரில் ஞாயிற்றுக்கிழமை (08) சம்பியனானதன் மூலம் பல முதற் தடவைகளை இந்தியா நிகழ்த்தியிருக்கிறது.

இருபதுக்கு – 20 உலகக் கிண்ணத் தொடரில் மூன்று தடவைகள் சம்பியனான முதல் அணியாக தனது பெயரை இந்தியா பதிவு செய்துள்ளது. இதற்கு முன்னர் இந்தியா, மேற்கிந்தியத் தீவுகள், இங்கிலாந்து ஆகியன தலா இரண்டு தடவைகள் சம்பியனாகியிருந்தன.

இதேவேளை இருபதுக்கு – 20 உலகக் கிண்ணத்தை தக்க வைத்த முதலாவது அணியாகவும் தமது பெயரை இந்திய அணி பதிவு செய்து கொண்டது.

இதுதவிர இருபதுக்கு – 20 உலகக் கிண்ணத்தை நடத்திய நாடு சம்பியனாகிய முதற் தடவையாகவும் இம்முறை பதிவானது.

இதேவேளை இருபதுக்கு – 20 உலகக் கிண்ண இறுதிப் போட்டியின் நாணயச் சுழற்சியில் தோற்று சம்பியனாகிய முதல் அணியாகவும் இந்தியா தமது பெயரைப் பதிவு செய்து கொண்டது.

இதை விட இருபதுக்கு – 20 உலகக் கிண்ண வரலாற்றில் இதற்கு முதல் நியூசிலாந்தை 2016, 2021-இல் சந்தித்த இந்தியா அப்போது தோற்றிருந்த நிலையில் இம்முறை இறுதிப் போட்டியிலேயே இருபதுக்கு – 20 உலகக் கிண்ணத் தொடரில் நியூசிலாந்துக்கெதிராக முதல் வெற்றியைப் பதிவு செய்தது.