டெஸ்ட் தரவரிசையில் முதலாமிடத்தில் இந்தியா

வருடாந்த இற்றைப்படுத்தலையடுத்து, சர்வதேச கிரிக்கெட் சபையின் டெஸ்ட் போட்டிகளுக்கான, அணிகளின் தரவரிசையில் முதலாமிடத்தில் இந்தியாவும், இரண்டாமிடத்தில் நியூசிலாந்தும் காணப்படுகின்றது.

இந்நிலையில், நான்காமிடத்திலிருந்து மூன்றாமிடத்துக்கு இங்கிலாந்து முன்னேறியுள்ளதுடன், எட்டாமிடத்திலிருந்து ஆறாமிடத்துக்கு மேற்கிந்தியத் தீவுகள் முன்னேறியுள்ளது.

அவுஸ்திரேலியாவுடனான 2017-18ஆம் ஆண்டு 0-4 தோல்வியானது தரவரிசைப் புள்ளிகளிலிருந்து விடுபட்டதையடுத்தே மூன்றாமிடத்துக்கு இங்கிலாந்து முன்னேறியுள்ளது.

தற்போது, கடந்தாண்டு மே மாதத்திலிருந்தான போட்டிகளின் முடிவுகள் 100 சதவீதம் தரப்படுத்தப்படுவதுடன், முன்னைய இரண்டு ஆண்டுகளின் முடிவுகள் 50 சதவீதமே தரப்படுத்தப்படுவது குறிப்பிடத்தக்கது.

பங்களாதேஷுக்கெதிரான தொடரை 2-0 என வென்றதுடன், இலங்கையுடனான தொடரை 0-0 எனச் சமப்படுத்திய நிலையிலேயே ஆறாமிடத்துக்கு மேற்கிந்தியத் தீவுகள் முன்னேறியுள்ளது.

முதல் 10 அணிகளின் தரவரிசை பின்வருமாறு,

1. இந்தியா, 2. நியூசிலாந்து, 3. இங்கிலாந்து, 4. அவுஸ்திரேலியா, 5. பாகிஸ்தான், 6. மேற்கிந்தியத் தீவுகள், 7. தென்னாபிரிக்கா, 8. இலங்கை, 9. பங்களாதேஷ், 10. சிம்பாப்வே.