தரவரிசையில் முதலாமிடத்துக்கு முன்னேறிய வில்லியம்ஸன்

சர்வதேச கிரிக்கெட் சபையின் டெஸ்ட் போட்டிகளுக்கான துடுப்பாட்டவீரர்களின் தரவரிசையில் முதலாமிடத்துக்கு நியூசிலாந்து அணித்தலைவர் கேன் வில்லியம்ஸன் முன்னேறியுள்ளார்.

பாகிஸ்தானுக்கெதிரான முதலாவது டெஸ்டில் 150 ஓட்டங்களைப் பெற்றதைத் தொடர்ந்தே மூன்றாமிடத்திலிருந்தே இரண்டு இடங்கள் முன்னேறியே முதலாமிடத்தை வில்லியம்ஸன் அடைந்துள்ளார்.

இதேவேளை, அவுஸ்திரேலியாவுக்கெதிரான இரண்டாவது டெஸ்டில் 139 ஓட்டங்களைப் பெற்ற இந்தியாவின் அஜின்கியா ரஹானே, 11ஆம் இடத்திலிருந்து ஐந்து இடங்கள் முன்னேறி ஆறாமிடத்தை அடைந்துள்ளார்.

முதல் 10 துடுப்பாட்டவீரர்களின் தரவரிசை பின்வருமாறு,

1. கேன் வில்லியம்ஸன், 2. விராட் கோலி, 3. ஸ்டீவ் ஸ்மித், 4. மர்னுஸ் லபுஷைன், 5. பாபர் அஸாம், 6. அஜின்கியா ரஹானே, 7. டேவிட் வோணர், 8. பென் ஸ்டோக்ஸ், 9. ஜோ றூட், 10. செட்டேஸ்வர் புஜாரா.

இந்நிலையில், இந்தியாவுக்கெதிரான இரண்டாவது டெஸ்டில் நான்கு விக்கெட்டுகளைக் கைப்பற்றிய அவுஸ்திரேலியாவின் மிற்செல் ஸ்டார்க், ஏழாமிடத்திலிருந்து இரண்டு இடங்கள் முன்னேறி ஐந்தாமிடத்தை அடைந்துள்ளார்.

குறித்த டெஸ்டில் ஐந்து விக்கெட்டுகளைக் கைப்பற்றிய இந்தியாவின் இரவிச்சந்திரன் அஷ்வின், ஒன்பதாமிடத்திலிருந்து இரண்டு இடங்கள் முன்னேறி ஏழாமிடத்தை அடைந்துள்ளார்.

தவிர, 10ஆம் இடத்திலிருந்து ஜஸ்பிரிட் பும்ரா, இந்த டெஸ்டில் ஆறு விக்கெட்டுகளைக் கைப்பற்றியதைத் தொடர்ந்து ஓரிடம் முன்னேறி ஒன்பதாமிடத்தை அடைந்துள்ளார்.

முதல் 10 பந்துவீச்சாளர்களின் தரவரிசை பின்வருமாறு,

1. பற் கமின்ஸ், 2. ஸ்டூவர்ட் ப்ரோட், 3. நீல் வக்னர், 4. டிம் செளதி, 5. மிற்செல் ஸ்டார்க், 6. ககிஸோ றபாடா, 7. இரவிச்சந்திரன் அஷ்வின், 8. ஜொஷ் ஹேசில்வூட், 9. ஜஸ்பிரிட் பும்ரா, 10. ஜேம்ஸ் அன்டர்சன்.

முதல் ஐந்து சகலதுறைவீரர்களின் தரவரிசை பின்வருமாறு,

1. பென் ஸ்டோக்ஸ், 2. ஜேஸன் ஹோல்டர், 3. இரவீந்திர ஜடேஜா, 4. ஷகிப் அல் ஹஸன், 5. மிற்செல் ஸ்டார்க்.