துடுப்பாட்டவீரர்களின் தரவரிசையில் ஏழாமிடத்துக்கு முன்னேறினார் டி கொக்

சர்வதேச கிரிக்கெட் சபையின் டெஸ்ட் போட்டிகளுக்கான துடுப்பாட்ட வீரர்களுக்கான தரவரிசையில் ஏழாமிடத்துக்கு, தென்னாபிரிக்காவின் விக்கெட் காப்பாளர் குயின்டன் டி கொக் முன்னேறியுள்ளார்.

இந்தியாவுக்கெதிரான முதலாவது டெஸ்டில் 111 ஓட்டங்களைப் பெற்றதைத் தொடர்ந்தே, 11ஆம் இடத்திலிருந்து நான்கு இடங்கள் முன்னேறி ஏழாமிடத்தை அடைந்துள்ளார்.

முதல் 10 துடுப்பாட்டவீரர்களின் தரவரிசை பின்வருமாறு,

1. ஸ்டீவ் ஸ்மித், 2. விராட் கோலி, 3. கேன் வில்லியம்சன், 4. செட்டேஸ்வர் புஜாரா, 5. ஹென்றி நிக்கொல்ஸ், 6. ஜோ றூட், 7. குயின்டன் டி கொக், 8. டொம் லேதம், 9. திமுத் கருணாரத்ன, 10. அஜின்கியா ரஹானே

இதேவேளை, பந்துவீச்சாளர்களுக்கான தரவரிசையில், தென்னாபிரிக்காவுக்கெதிரான முதலாவது டெஸ்டில் எட்டு விக்கெட்டுகளைக் கைப்பற்றிய இந்தியாவின் இரவிச்சந்திரன் அஷ்வின், 14ஆம் இடத்திலிருந்து நான்கு இடங்கள் முன்னேறி 10ஆம் இடத்தை அடைந்துள்ளார்.

முதல் 10 பந்துவீச்சாளர்களின் தரவரிசை பின்வருமாறு,

1. பற் கம்மின்ஸ், 2. ககிஸோ றபாடா, 3. ஜஸ்பிரிட் பும்ரா, 4. ஜேஸன் ஹோல்டர், 5. வேர்ணன் பிலாந்தர், 6. ஜேம்ஸ் அன்டர்சன், 7. ட்ரெண்ட் போல்ட், 8. நீல் வக்னர், 9. கேமார் றோச், 10. இரவிச்சந்திரன் அஷ்வின்.

இந்நிலையில், தென்னாபிரிக்காவுக்கெதிரான முதலாவது டெஸ்டில் ஆறு விக்கெட்டுகளைக் கைப்பற்றியதோடு, 70 ஓட்டங்களைப் பெற்றிருந்த இந்தியாவின் இரவீந்திர ஜடேஜா, சகலதுறைவீரர்களுக்கான தரவரிசையில் மூன்றாமிடத்திலிருந்து ஒரு இடம் முன்னேறி இரண்டாமிடத்தை அடைந்துள்ளார். இதேவேளை, ஆறாமிடத்திலிருந்த இரவிச்சந்திரன் அஷ்வின், ஒரு இடம் முன்னேறி ஐந்தாமிடத்தை அடைந்துள்ளார்.

முதல் ஐந்து சகலதுறைவீரர்களின் தரவரிசை பின்வருமாறு,

1. ஜேஸன் ஹோல்டர், 2. இரவீந்திர ஜடேஜா, 3. ஷகிப் அல் ஹஸன், 4. பென் ஸ்டோக்ஸ், 5. இரவிச்சந்திரன் அஷ்வின்.