தொடரைக் கைப்பற்றிய மேற்கிந்தியத் தீவுகள்

இங்கிலாந்துக்கெதிரான இருபதுக்கு – 20 சர்வதேசப் போட்டித் தொடரை மேற்கிந்தியத் தீவுகள் கைப்பற்றியுள்ளது.

ஐந்து போட்டிகள் கொண்ட இத்தொடரில், பார்படோஸில் இன்று அதிகாலை நடைபெற்ற ஐந்தாவது போட்டியில் வென்றதன் மூலமே 3-2 என தொடரை மேற்கிந்தியத் தீவுகள் கைப்பற்றியுள்ளது.

இப்போட்டியின் நாணயச் சுழற்சியில் வென்ற மேற்கிந்தியத் தீவுகளின் அணித்தலைவர் கெரான் பொலார்ட், தமதணி முதலில் துடுப்பெடுத்தாடும் என அறிவித்தார்.

அந்தவகையில், முதலில் துடுப்பெடுத்தாடிய மேற்கிந்தியத் தீவுகள், றொவ்மன் பவலின் ஆட்டமிழக்காத 35 (17), கெரான் பொலார்ட்டின் ஆட்டமிழக்காத 41 (25), கைல் மேயர்ஸின் 31 (19), பிரண்டன் கிங்கின் 34 (31) ஓட்டங்களுடன் 20 ஓவர்களில் 4 விக்கெட்டுகளை இழந்து 179 ஓட்டங்களைப் பெற்றது. பந்துவீச்சில், அடில் ரஷீட் 4-0-17-2, லியாம் லிவிங்ஸ்டோன் 3-0-17-2, மொயின் அலி 3-0-20-0 என்ற பெறுதிகளைக் கொண்டிருந்தனர்.

பதிலுக்கு, 180 ஓட்டங்களை வெற்றியிலக்காகக் கொண்டு துடுப்பெடுத்தாடிய இங்கிலாந்து சார்பாக ஜேம்ஸ் வின்ஸ் 55 (35), சாம் பில்லிங்ஸ் 41 (28) ஓட்டங்களைப் பெற்றபோதும், முதலில் அகீல் ஹொஸைனிடமும், இனிங்ஸின் இறுதி நான்கு பந்துகளில் ஜேஸன் ஹோல்டரிடமும் தலா நான்கு விக்கெட்டுகளைப் பறிகொடுத்து, 19.5 ஓவர்களில் சகல விக்கெட்டுகளையும் இழந்து 162 ஓட்டங்களைப் பெற்று 17 ஓட்டங்களால் தோல்வியடைந்தது. பந்துவீச்சில், அகீல் ஹொஸைன் 4-0-30-4, ஜேஸன் ஹோல்டர் 2.5-0-27-5, ஷெல்டன் கோட்ரல் 3-0-21-0, கெரான் பொலார்ட் 2-0-15-0, றொமாறியோ ஷெப்பர்ட் 1-0-7-0, பேபியன் அலன் 3-0-17-0 என்ற பெறுதிகளைக் கொண்டிருந்தனர்.

இப்போட்டியின் நாயகனாகவும், தொடரின் நாயகனாகவும் ஜேஸன் ஹோல்டர் தெரிவாகினார்.