பலஸிடம் தோற்ற லிவர்பூல்

இங்கிலாந்து கால்பந்தாட்டக் கழகங்களுக்கிடையிலான பிறீமியர் லீக் தொடரில், கிறிஸ்டல் பலஸின் மைதானத்தில் சனிக்கிழமை (27) நடைபெற்ற அவ்வணியுடனான போட்டியில் 1-2 என்ற கோல் கணக்கில் நடப்புச் சம்பியன்களான லிவர்பூல் தோற்றது.

லிவர்பூல் சார்பாகப் பெறப்பட்ட கோலை பெடெரிக்கோ சியெஸ்கா பெற்றதோடு, பலஸ் சார்பாக இஸ்மைலா சார், எடி நிகிட்டியா ஆகியோர் தலா ஒவ்வொரு கோலைப் பெற்றனர்.

இதேவேளை தமது மைதானத்தில் நடைபெற்ற பிறைட்டன் அன்ட் ஹொவ் அல்பியனுடனான போட்டியில் 1-2 என்ற கோல் கணக்கில் செல்சி தோற்றது. செல்சி சார்பாகப் பெறப்பட்ட கோலை என்ஸோ பெர்ணாண்டஸ் பெற்றனர். பிறைட்டன் சார்பாக டனி வெல்பக் இரண்டு கோல்களையும், மக்ஸிம் டி குய்பர் ஒரு கோலையும் பெற்றனர்.

இந்நிலையில் பிறென்ஃபோர்ட்டின் மைதானத்தில் நடைபெற்ற அவ்வணியுடனான போட்டியில் 1-3 என்ற கோல் கணக்கில் மன்செஸ்டர் யுனைட்டெட் தோற்றது. யுனைட்டெட் சார்பாகப் பெறப்பட்ட கோலை பெஞ்சமின் செஸ்கோ பெற்றதோடு, பிறென்ஃபோர்ட் சார்பாக இகோர் தியாகோ இரண்டு கோல்களையும், மதியாஸ் ஜென்சன் ஒரு கோலையும் பெற்றனர்.

இதேவேளை தமது மைதானத்தில் ஞாயிற்றுக்கிழமை (28) நடைபெற்ற  வொல்வர்ஹம்ப்டன் வொன்டரேர்ஸுடனான போட்டியை 1-1 என்ற கோல் கணக்கில் டொட்டென்ஹாம் சமப்படுத்தியது. டொட்டென்ஹாம் சார்பாகப் பெறப்பட்ட கோலை ஜோவா பலின்ஹா பெற்றதோடு, வொல்வ்ஸ் சார்பாகப் பெறப்பட்ட கோலை சன்டியாகோ புவேனோ பெற்றிருந்தார்.