புதிய தலைவர் ஞாயிறன்று தெரிவு

இந்திய கிரிக்கெட் கட்டுப்பாட்டுச் சபையின் புதிய தலைவர், வரும் ஞாயிறன்று (ஒக். 4) தெரிவுசெய்யப்படவுள்ளார். மும்பையில் ஏற்பாடு செய்யப்பட்டுள்ள விசேட பொதுக் கூட்டத்திலேயே அவர் தெரிவுசெய்யப்படவுள்ளார்.

இந்திய கிரிக்கெட் கட்டுப்பாட்டுச் சபையின் தலைவராக இருந்த ஜக்மோகன் டால்மியா, திடீரென மரணமடைந்ததன் காரணமாக ஏற்பட்ட இடைவெளிக்கே, புதிய தலைவர் நியமிக்கப்படவுள்ளார்.

புதிய தலைவராக, இந்திய கிரிக்கெட் கட்டுப்பாட்டுச் சபையின் முன்னாள் தலைவரான ஷாங் மனோகர் தெரிவு செய்யப்படுவார் என எதிர்பார்க்கப்படுகிறது.

இந்திய ஆளுங்கட்சியும் பல கிரிக்கெட் சபைகளைக் கட்டுப்பாட்டுக்குள் கொண்டிருப்பதுமான பாரதிய ஜனதாக் கட்சியின் ஆதரவு, மனோகருக்குக் கிடைத்திருப்பதன் காரணமாகவே, அவர் எதிர்ப்புகளின்றித் தெரிவாவார் என எதிர்பார்க்கப்படுகிறது.