முதலிடத்துக்கு முன்னேறினார் பின்ஞ்

சிம்பாப்வே, பாகிஸ்தான், அவுஸ்திரேலிய அணிகளுக்கிடையிலானதும் இங்கிலாந்து, இந்திய அணிகளுக்குமிடையிலானதுமான இருபதுக்கு – 20 சர்வதேசப் போட்டித் தொடர்களைத் தொடர்ந்து வெளியிடப்பட்டுள்ள இருபதுக்கு – 20 சர்வதேசப் போட்டிகளுக்கான துடுப்பாட்ட வீரர்களுக்கான தரவரிசையில், அவுஸ்திரேலிய அணியின் இருபதுக்கு – 20 சர்வதேசப் போட்டிகளுக்கான அணித்தலைவர் ஆரோன் பின்ஞ் முதலிடத்துக்கு முன்னேறியுள்ளார்.

முத்தரப்புத் தொடரின் ஐந்து போட்டிகளில் 306 ஓட்டங்களைப் பெற்றதையடுத்தே, நான்காமிடத்திலிருந்து முதலாமிடத்துக்கு முன்னேறியுள்ளார். இதேவேளை, குறித்த தொடரின் ஐந்து போட்டிகளில் 278 ஓட்டங்களைப் பெற்ற பாகிஸ்தானின் ஆரம்பத் துடுப்பாட்ட வீரர் பக்கர் ஸமன் 44 இடங்கள் முன்னேறி இரண்டாமிடத்தைப் பிடித்துள்ளார். இதுதவிர, இங்கிலாந்துக்கெதிரான தொடரில், மூன்று போட்டிகளில் 126 ஓட்டங்களைப் பெற்ற லோகேஷ் ராகுல் ஒன்பது இடங்கள் முன்னேறி மூன்றாமிடத்தைப் பிடித்துள்ளார்.