மூன்றாமிடத்துக்கு முன்னேறிய ஹஸரங்க

சர்வதேச கிரிக்கெட் சபையின் இருபதுக்கு – 20 சர்வதேசப் போட்டிகளுக்கான சகலதுறைவீரர்களுக்கான தரவரிசையில் மூன்றாமிடத்துக்கு இலங்கையின் வனிடு ஹஸரங்க முன்னேறியுள்ளார்.

நடைபெற்றுவரும் உலகக் கிண்ணத் தொடரில், மேற்கிந்தியத் தீவுகளுக்கெதிரான சுப்பர் 12 போட்டியில் இரண்டு விக்கெட்டுகளைக் கைப்பற்றியமையைத் தொடர்ந்தே, நான்காமிடத்திலிருந்து ஓரிடம் முன்னேறி மூன்றாமிடத்தை அடைந்துள்ளார்.

இதேவேளை, இத்தொடரில் பங்களாதேஷுக்கெதிரான போட்டியில் ஒரு விக்கெட்டைக் கைப்பற்றிய அவுஸ்திரேலியாவின் கிளென் மக்ஸ்வெல், ஏழாமிடத்திலிருந்து மூன்று இடங்கள் முன்னேறி நான்காமிடத்தை அடைந்துள்ளார்.

முதல் ஐந்து சகலதுறைவீரர்களின் தரவரிசை பின்வருமாறு,

1. மொஹமட் நபி, 2. ஷகிப் அல் ஹஸன், 3. வனிடு ஹஸரங்க, 4. கிளென் மக்ஸ்வெல், 5. ஸீஷன் மஸ்கூட்.

இந்நிலையில், இங்கிலாந்துக்கெதிரான போட்டியில் 52 ஓட்டங்களைப் பெற்ற தென்னாபிரிக்காவின் ஏய்டன் மார்க்ரம், ஆறாமிடத்திலிருந்து மூன்று இடங்கள் முன்னேறி மூன்றாமிடத்தை அடைந்துள்ளார்.

இதேவேளை, ஆப்கானிஸ்தான், ஸ்கொட்லாந்து, நமீபியாவுக்கெதிரான போட்டிகளில் முறையே 69, 50, 54 ஓட்டங்களைப் பெற்ற லோகேஷ் ராகுல், எட்டாமிடத்திலிருந்து மூன்று இடங்கள் முன்னேறி ஐந்தாமிடத்தை அடைந்துள்ளார்.

தவிர, இங்கிலாந்துக்கெதிரான போட்டியில் 94 ஓட்டங்களைப் பெற்ற தென்னாபிரிக்காவின் றஸி வான் டர் டுஸன், 16ஆம் இடத்திலிருந்து ஆறு இடங்கள் முன்னேறி 10ஆம் இடத்தை அடைந்துள்ளார்.

முதல் 10 துடுப்பாட்டவீரர்களின் தரவரிசை பின்வருமாறு,

1. பாபர் அஸாம், 2. டேவிட் மலான், 3. ஏய்டன் மார்க்ரம், 4. ஆரோன் பின்ஞ், 5. லோகேஷ் ராகுல், 6. மொஹமட் றிஸ்வான், 7. டெவோன் கொன்வே, 8. விராட் கோலி, 9. ஜொஸ் பட்லர், 10. றஸி வான் டர் டுஸன்.

இதேவேளை, பங்களாதேஷ், மே. தீவுகளுக்கெதிரான போட்டியில் முறையே ஐந்து, ஒரு விக்கெட்டைக் கைப்பற்றிய அவுஸ்திரேலியாவின் அடம் ஸாம்பா, ஆறாமிடத்திலிருந்து ஓரிடம் முன்னேறி ஐந்தாமிடத்தை அடைந்துள்ளார்.

தவிர, மேற்படி இரண்டு போட்டிகளிலும் இரண்டு, நான்கு விக்கெட்டுகளைக் கைப்பற்றிய அவுஸ்திரேலியாவின் ஜொஷ் ஹேசில்வூட், 19ஆம் இடத்திலிருந்து 11 இடங்கள் முன்னேறி எட்டாமிடத்தை அடைந்துள்ளார்.

இதேவேளை, ஸ்கொட்லாந்து, நமீபியா, ஆப்கானிஸ்தானுக்கெதிரான போட்டிகளில் முறையே ஒன்று, இரண்டு, இரண்டு விக்கெட்டுகளைக் கைப்பற்றிய நியூசிலாந்தின் டிம் செளதி, 12ஆம் இடத்திலிருந்து மூன்று இடங்கள் முன்னேறி ஒன்பதாமிடத்தை அடைந்துள்ளார்.

முதல் 10 பந்துவீச்சாளர்களின் தரவரிசை பின்வருமாறு,

1. வனிடு ஹஸரங்க, 2. தப்ரையாஸ் ஷம்சி, 3. அடில் ரஷீட், 4. ரஷீட் கான், 5. அடம் ஸாம்பா, 6. முஜீப் உர் ரஹ்மான், 7. அன்றிச் நொர்ட்ஜே, 8. ஜொஷ் ஹேசில்வூட், 9. டிம் செளதி, 10. கிறிஸ் ஜோர்டான்.