மேற்கிந்தியத் தீவுகளுக்கெதிரான 2ஆவது டெஸ்டில் முன்னிலையில் நியூசிலாந்து

மேற்கிந்தியத் தீவுகளுக்கெதிரான இரண்டாவது டெஸ்டில் நியூசிலாந்து முன்னிலையில் காணப்படுகின்றது.

மூன்று போட்டிகள் கொண்ட இத்தொடரின் முதலாவது போட்டியானது வெற்றி தோல்வியின்றி முடிவடைந்த நிலையில், வெலிங்டனில் புதன்கிழமை (10) ஆரம்பித்த இப்போட்டியின் நாணயச் சுழற்சியில் வென்ற நியூசிலாந்தின் அணித்தலைவர் டொம் லேதம் தமதணி முதலில் களத்தடுப்பிலீடுபடுமென அறிவித்தார்.

அந்தவகையில் முதலில் துடுப்பெடுத்தாடிய மேற்கிந்தியத் தீவுகள், பிளையர் டிக்னர் (4), மைக்கல் றே (3), கிளென் பிலிப்ஸ், ஜேக்கப் டஃபியிடம் விக்கெட்டுகளைப் பறிகொடுத்து சகல விக்கெட்டுகளையும் இழந்து தமது முதலாவது இனிங்ஸில் 205 ஓட்டங்களையே பெற்றது. ஷாய் ஹோப் 48, ஜோன் கம்பெல் 44, பிரெண்டன் கிங் 33, அணித்தலைவர் றொஸ்டன் சேஸ் 29 ஓட்டங்களைப் பெற்றனர்.

பதிலுக்கு தமது முதலாவது இனிங்ஸில் துடுப்பெடுத்தாடி வரும் நியூசிலாந்து, இன்றைய முதலாம் நாள் முடிவில் விக்கெட் இழப்பின்றி 24 ஓட்டங்களைப் பெற்றுள்ளது. களத்தில் லேதம் ஏழு ஓட்டங்களுடனும், டெவொன் கொன்வே 16 ஓட்டங்களுடனும் ஆட்டமிழக்காமலுள்ளனர்.