றியல் மட்ரிட்டை வென்றது டொட்டென்ஹாம்

ஐரோப்பிய கால்பந்தாட்டக் கழகங்களுக்கிடையிலான சம்பியன்ஸ் லீக் தொடரின் குழுநிலைப் போட்டிகளில், நேற்று  இடம்பெற்ற போட்டிகளில், டொட்டென்ஹாம் ஹொட்ஸ்பர்ஸ், மன்செஸ்டர் சிற்றி, செவில்லா, லிவர்பூல் ஆகிய அணிகள் வெற்றிபெற்றன.

இங்கிலாந்து பிறீமியர் லீக் கழகமான டொட்டென்ஹாம் ஹொட்ஸ்பர்ஸ், 3-1 என்ற கோல் கணக்கில், சம்பியன்ஸ் லீக்கின் நடப்புச் சம்பியன்களான றியல் மட்ரிட்டை வென்றது. டொட்டென்ஹாம் ஹொட்ஸ்பர்ஸ் சார்பாக, டெலே அல்லி இரண்டு கோல்களையும் கிறிஸ்டியான் எரிக்ஸன் ஒரு கோலையும் பெற்றனர். றியல் மட்ரிட் சார்பாகப் பெறப்பட்ட கோலை கிறிஸ்டியானோ ரொனால்டோ பெற்றிருந்தார்.

இன்னொரு இங்கிலாந்து பிறீமியர் லீக் கழகமான மன்செஸ்டர் சிற்றி, இத்தாலியக் கழகமான நாப்போலியை, 4-2 என்ற கோல் கணக்கில் வென்றது. மன்செஸ்டர் சிற்றி சார்பாக, நிக்கொலஸ் ஒட்டமென்டி, ஜோன் ஸ்டோன்ஸ், சேர்ஜியோ அகுரோ, ரஹீம் ஸ்டேர்லிங் ஆகியோர் தலா ஒவ்வொரு கோலைப் பெற்றனர். நாப்போலி சார்பாக, லொறென்ஸோ இன்சீனியா, ஜோர்ஜின்ஹோ ஆகியோர் தலா ஒவ்வொரு கோலைப் பெற்றனர்.

மற்றொரு இங்கிலாந்து பிறீமியர் லீக் கழகமான லிவர்பூல், 3-0 என்ற கோல் கணக்கில், ஸ்லோவேனியக் கழகமான என்.கே மரிபோரை வென்றது. லிவர்பூல் சார்பாக, மொஹமட் சாலா, எம்ரே கான், டேனியல் ஸ்டரிட்ஜ் ஆகியோர் தலா ஒவ்வொரு கோலைப் பெற்றனர்.

ஸ்பானியக் கழகமான செவில்லா, 2-1 என்ற கோல் கணக்கில், ரஷ்யக் கழகமான ஸ்பார்டக் மொஸ்கோவை வென்றது. செவில்லா சார்பாக, கிளெமென்ட் லெங்லெட், எவெர் பனீகா ஆகியோர் தலா ஒவ்வொரு கோலைப் பெற்றனர். ஸ்பார்டக் மொஸ்கோ சார்பாகப் பெறப்பட்ட கோலை ஸி லூயிஸ் பெற்றார்.

ஜேர்மனியக் கழகமான பொரிசியா டொட்டமுண்ட், சைப்ரஸ் கழகமான அப்போயல் நிக்கோசியா ஆகியவற்றுக்கிடையேயான போட்டியில், இரண்டு அணிகளும் தலா ஒவ்வொரு கோலைப் பெற்ற நிலையில், போட்டி சமநிலையில் முடிவடைந்தது. பொரிசியா டொட்டமுண்ட் சார்பாகப் பெறப்பட்ட கோலை ரபேல் குரெய்ரோவும் அப்போயல் நிக்கோசியா சார்பாகப் பெறப்பட்ட கோலை மிச்சேல் பொட்டேயும் பெற்றனர்.

பிரெஞ்சு லீக் 1 கழகமான மொனாக்கோ, துருக்கிக் கழகமான பெஸ்கிட்டாஸ் ஆகிய அணிகளுக்கிடையிலான போட்டியில், இரண்டு அணிகளும் தலா ஒவ்வொரு கோலைப் பெற்ற நிலையில், போட்டி சமநிலையில் முடிவடைந்தது. மொனாக்கோ சார்பாகப் பெறப்பட்ட கோலை றொனி லொபேஸ் பெற்றதோடு, பெஸ்கிட்டாஸ் சார்பாகப் பெறப்பட்ட கோலை செங் டொசுன் பெற்றிருந்தார்.