வெளியேற்றப்பட்டார் பார்டி

அவுஸ்திரேலியாவின் மெல்பேணில் நடைபெற்றுவரும் அவுஸ்திரேலிய பகிரங்க டென்னிஸ் தொடரிலிருந்து, உலகின் முதல்நிலை வீராங்கனையான அஷ்லெய் பார்ட்டி வெளியேற்றப்பட்டார்.

இன்று நடைபெற்ற தனது காலிறுதிப் போட்டியில், செக் குடியரசின் கரோலினா முஷோவாவை எதிர்கொண்ட அவுஸ்திரேலியாவின் பார்ட்டி, 6-1, 3-6, 2-6 என்ற செட் கணக்கில் தோல்வியடைந்து தொடரிலிருந்து வெளியேறினார்.

இதேவேளை, சக ஐக்கிய அமெரிக்க வீராங்கனையான ஜெஸிக்கா பெகுலாவை தனது காலிறுதிப் போட்டியில் எதிர்கொண்ட ஜெனிஃபர் பிராடி, 4-6, 6-2, 6-1 என்ற செட் கணக்கில் வென்று அரையிறுதிப் போட்டிக்குத் தகுதிபெற்றார்.

இந்நிலையில், உலகின் எட்டாம்நிலை வீரரான சக ரஷ்யரான அன்ட்ரே ருப்லெவ்வை தனது காலிறுதிப் போட்டியில் எதிர்கொண்ட நான்காம்நிலை வீரரான டனில் மெட்வெடெவ், 7-5, 6-3, 6-2 என்ற நேர் செட்களில் வென்று அரையிறுதிப் போட்டிக்குத் தகுதிபெற்றார்.