வெள்ளையடித்தது பாகிஸ்தான்

பாகிஸ்தான், மேற்கிந்தியத் தீவுகள் அணிகளுக்கிடையிலான 3 போட்டிகள் கொண்ட இருபதுக்கு-20 தொடரின் 3ஆவது போட்டியையும் வெற்றிகொண்ட பாகிஸ்தான் அணி, 3-0 என்ற கணக்கில் அத்தொடரைக் கைப்பற்றியுள்ளது.

அபு தாபியில் இடம்பெற்ற இப்போட்டியில் முதலில் துடுப்பெடுத்தாடப் பணிக்கப்பட்ட மேற்கிந்தியத் தீவுகள் அணி, 20 ஓவர்களில் 5 விக்கெட்டுகளை இழந்து 103 ஓட்டங்களை மாத்திரம் பெற்றது. ஆரம்பத்திலிருந்து தடுமாறினாலும், 12.3 ஓவர்களில் 4 விக்கெட்டுகளை இழந்து 66 ஓட்டங்களுடன் காணப்பட்ட அவ்வணி, இறுதி 45 பந்துகளில் 37 ஓட்டங்களை மாத்திரமே பெற்றது.

துடுப்பாட்டத்தில் மார்லன் சாமுவேல்ஸ் ஆட்டமிழக்காமல் 42 (59), கெரான் பொலார்ட் ஆட்டமிழக்காமல் 16 (17), நிக்கொலஸ் பூரன் 16 (12) ஓட்டங்களைப் பெற்றனர். பந்துவீச்சில் இமாட் வசீம், 4 ஓவர்களில் 21 ஓட்டங்களுக்கு 3 விக்கெட்டுகளைக் கைப்பற்றினார்.

104 ஓட்டங்களை வெற்றியிலக்காகக் கொண்டு துடுப்பெடுத்தாடிய பாகிஸ்தான் அணி, 15.1 ஓவர்களில் 2 விக்கெட்டுகளை இழந்து வெற்றியிலக்கை அடைந்தது. துடுப்பாட்டத்தில் ஷொய்ப் மலிக் ஆட்டமிழக்காமல் 43 (34), பாபர் அஸாம் ஆட்டமிழக்காமல் 27 (24), காலிட் லத்தீப் 21 (20) ஓட்டங்களைப் பெற்றனர். பந்துவீச்சில் கெஸ்றிக் வில்லியம்ஸ், 4 ஓவர்களில் 15 ஓட்டங்களுக்கு 2 விக்கெட்டுகளைக் கைப்பற்றினார்.

இப்போட்டியின் நாயகனாகவும் தொடரின் நாயகனாகவும், இமாட் வசீம் தெரிவானார்.