கொடுத்த கடனை திரும்ப கேட்ட நபருக்கு கொதிநீர் அபிஷேகம்; லுணுகலையில் சம்பவம்

(சி.எம்.ரிஃபாத்)

கொடுத்த கடனை திரும்பக் கேட்டவரின் மீது கொதிநீரை ஊற்றிய கொடூர சம்பவமொன்று லுணுகலை, ஹோப்டன் தோட்டத்தில் இன்று காலை இடம்பெற்றுள்ளது. சம்பவத்தில் பாதிக்கப்பட்ட நபர் லுணுகலை வைத்தியசாலையில் அனுமதிக்கப்பட்டுள்ளார்.

குறித்த தோட்டத்தைச் சேர்ந்த தோட்டத் தொழிலாளி ஒருவர் மற்றுமொரு நபரிடமிருந்து ஒரு தொகைப் பணத்தைக் கடனுதவியாகப் பெற்றுள்ளார்.

பல மாதங்கள் கடந்த நிலையில் அந்தக் கடனை திருப்பிச் செலுத்தாமையினால் பணத்தைக் கொடுத்த நபர் மேற்படி தொழிலாளியின் வீட்டுக்குச் சென்று கடனை திரும்பத் தருமாறு கோரியுள்ளார்.

இதன்போது இருவருக்குமிடையில் வாக்குவாதம் ஏற்பட்டதையடுத்து கோபமடைந்துள்ள தொழிலாளி - கொதிநீரை எடுத்து வந்து கடன் வழங்கியவர் மீது ஊற்றியுள்ளார். இதனால் காயங்களுக்குள்ளான அவர் அயலவர்களின் உதவியுடன் வைத்தியசாலையில் அனுமதிக்கப்பட்டார்.

சம்பவத்தை அடுத்து அங்கு விரைந்த பொலிஸார் சந்தேக நபரான தொழிலாளியைக் கைது செய்ததுடன் சம்பவம் தொடர்பான தீவிர விசாரணைகளையும் மேற்கொண்டு வருகின்றனர்.