பங்குகளின் விலைகள் காரணமின்றி சூழ்ச்சித்திறனுடன் மழுங்கடிக்கப்படுவதாக முதலீட்டாளர்கள் புகார்

- பங்குச்சந்தை மற்றும் தங்கம், வெள்ளி விலை நிலைவரங்கள் 

 

(ச.சேகர்)

 

கொழும்பு பங்குச்சந்தை கொடுக்கல் வாங்கல்கள் குறித்த சில பங்கு முகவர்களின் காரணமின்றி சூழ்ச்சித்திறனுடன் மழுங்கடிக்கப்பட்டு, குறிப்பிட்ட சில நிறுவனங்களின் பங்குகளின் விலைகள் உயர்த்தப்படுவதாக முதலீட்டாளர்கள் புகார் செய்திருந்தனர். உள்நாட்டு சிறியளவிலான முதலீட்டாளர்களே இந்த நடவடிக்கைகளின் மூலம் பாதிக்கப்படுவதாகவும் அவர்கள் தெரிவித்திருந்தனர். கடந்த வார கொடுக்கல் வாங்கல்களும் சரிவு நிலையில் இடம்பெற்றிருந்தமை குறிப்பிடத்தக்கது.  

 

கடந்த வெள்ளிக்கிழமை பங்குச் சந்தை நடவடிக்கைகள் நிறைவடையும் பொழுது, அனைத்து பங்கு விலைச் சுட்டெண் 6,028.74 ஆகவும், S&P ஸ்ரீலங்கா 20 சுட்டி 3385.43 ஆகவும் அமைந்திருந்தன. 

 

ஜூலை 8ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 1,466,585,139 அமைந்திருந்தது. கடந்த வாரம் மொத்தமாக 22,997 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 22,071 ஆகவும் வெளிநாட்டு கொடுக்கல் வாங்கல்கள் 926 ஆகவும் பதிவாகியிருந்தன.

 

கடந்த வார கொடுக்கல் வாங்கல் நடவடிக்கைகளில் எஸ்எம்பி லீசிங்(சாதாரண), டச்வுட், டங்கரீன், கெல்சி மற்றும் கொமர்ஷல் டிவல. போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

பிசி பார்மா, பிசிஎச் ஹோல்டிங்ஸ், யூனியன் கெமிக்கல்ஸ், சிஐஎஃவ்எல் மற்றும் அஸ்கொட் ஹோல்டிங்ஸ் போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

 

தங்கம் மற்றும் வெள்ளி விலை 

கடந்த வாரம் 24 கெரட் தங்கத்தின் சராசரி விலை 43,500 ரூபாவாகவும், 22 கெரட் தங்கத்தின் விலை 40,000 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

நாணய மாற்று விகிதம்

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 132.57 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 201.62 ஆக காணப்பட்டிருந்தது. தொடர்ந்தும் டொலருக்கு நிகராக ரூபாவின் பெறுமதி குறைவடைந்த நிலையிலேயே கடந்த வாரமும் காணப்பட்டது.