ஆத்திக்குழி குளக்கட்டு பிரதான வீதி புனரமைப்பு பணி ஆரம்பம்

-எஸ்.றொசேரியன் லெம்பேட் 

நீண்ட காலமாக பாதிப்படைந்த நிலையில் காணப்பட்ட நானாட்டான் பிரதேசச் செயலாளர் பிரிவுக்குட்பட்ட ஆத்திக்குழி குளக்கட்டு பிரதான வீதி கொங்கிரீட் வீதியாக அமைக்கும் பணி, தமிழ்த் தேசியக் கூட்டமைப்பின் வன்னி மாவட்ட நாடாளுமன்ற உறுப்பினரும் குழுக்களின் பிரதி அவைத் தலைவருமான செல்வம் அடைக்கலநாதனின் நிதி ஒதுக்கீட்டில், இன்று காலை 10 மணியளவில் ஆரம்பித்து வைக்கப்பட்டது.

மன்னார் நகர சபையின் தவிசாளர் ஞானப்பிரகாசம் அன்டனி டேவிட்சன், நானாட்டான் பிரதேச சபை தவிசாளர் திருச்செல்வம் பரஞ்சோதி ஆகியோர் இணைந்து, குறித்த வீதி அமைக்கும் பணியை வைபவ ரீதியாக ஆரம்பித்து வைத்தனர்.

10 மில்லியன் ரூபாய் நிதி ஒதுக்கீட்டில், 550 மீற்றர் நீளம் கொண்ட ஆத்திக்குழி குளக்கட்டு பிரதான வீதி, கொங்கிரீட் வீதியாக அமைக்கும் ஆரம்ப பணிகள் இடம்பெற்றன

இதன்போது, நானாட்டான் பிரதேச சபையின் உப தவிசாளர் எஸ்.லூர்துநாயகம் (புவனம்), நானாட்டான் பிரதேச சபை உறுப்பினர்கள்,டெலோ இயக்கத்தின் இளைஞர் அணி செயலாளர் ஜீ.பிறேம், நாடாளுமன்ற உறுப்பினரின் மாவட்ட இணைப்பாளர் ப.மதன் ஆகியோர் கலந்துகொண்டனர்.

இதேவேளை, உமநகரி, அச்சங்குளம் வீதிகளும் தலா 10 மில்லியன் ரூபாய் நிதி ஒதுக்கீட்டில் கொங்கிரீட் வீதியாக அமைக்கப்பட்டு வருகின்றமை குறிப்பித்தக்கது.