'ஆட்டக்காரி நெல்லினத்துக்கு பிரதியீடு வேண்டும்'

நடராசா கிருஸ்ணகுமார்

ஆட்டக்காரி நெல்லினத்துக்குப் பதிலான சிவப்புநிற நெல்லினம் கிளிநொச்சி மாவட்டத்தில் இல்லையென விவசாயிகளினால், கிளிநொச்சி மாவட்டச் செயலர் சுந்தரம் அருமைநாயகத்திடம் முறைப்பாடு தெரிவிக்கப்பட்டுள்ளது.

கிளிநொச்சி மாவட்டச் செயலகத்தில் வியாழக்கிழமை (15) நடைபெற்ற விவசாயக் குழுக் கூட்டத்தில் இம்முறைப்பாடு தெரிவிக்கப்பட்டுள்ளது.

ஆட்டக்காரி நெல்லினம் நோய்களை உருவாக்கக்கூடிய நெல்லினம் என்பதினால் அதனை விவசாயிகள் பயன்படுத்துவதில்லை.

ஆட்டக்காரி நெல்லினத்துக்கு பிரதியீடான 400-6 நெல்லினம் விதைக்கப்பட்டால் அறுவடை செய்ய நான்கரை மாதம் ஆகும்.

எனவே, காலபோக நெற்செய்கையில் அவற்றினைப் பயன்படுத்தமுடியாது.

கிளிநொச்சி மாவட்டத்துக்கென மூன்றரை மாத சிவப்பு நெல்லினத்தை பெற்றுக்கொள்ளக்கூடிய வழிகளை உருவாக்கித்தரும்படியும் விவசாயிகள் இதன்போது கோரிக்கை விடுத்துள்ளனர்.