செக்ஸ் பொம்மைகளை மிதவை பொருட்களாக பயன்படுத்திய காதல் ஜோடி நெருக்கடியில்

அவுஸ்திரேலியாவில் வெள்ளத்தில் அகப்பட்ட  இளம்  ஜோடியொன்று செக்ஸ் பொம்மையைப் பயன்படுத்தி நீந்தி நதியொன்றை கடக்க முயன்றபோது பெரும் நெருக்கடிக்குள்ளானது.

அத்துடன் இத்தகைய செக்ஸ் பொம்மைகளை  மிதக்கும் சாதனங்களாக பயன்படுத்தக்கூடாது என்ற அறிவுறுத்தலை பொலிஸார் விடுப்பதற்கும் இச்சம்பவம் வழிகோலியுள்ளது.

குயின்ஸ்லாந்தில் அண்மையில் ஏற்பட்ட வெள்ளத்தில் யாரா ஆறு பெருக்கெடுத்தபோது ஒரு ஆணும் பெண்ணும் தமது வீட்டிலிருந்து ஆளுயர செக்ஸ் பொம்மைகளை மிதவைகளாக பயன்படுத்தி அந்த ஆற்றை கடந்து செல்ல முற்பட்டனர்.  

ஆனால்,  மேற்படி பெண் கடுமையான நீரோட்டத்தில் தன்வசமிருந்த பொம்மையை தவறவிட்டதால் பேராபத்தை எதிர்நோக்கினார். 19 வயதுடைய அவர்கள்  இருவரும் வெள்ள நீரில் பெரும் சிரமப்பட்டனர்.

அவர்கள் மரக்கொம்பொன்றை பிடித்தவண்ணம் மற்றவர்களின் உதவிக்காக எதிர்பார்த்திருந்தனர்.  அதிஷ்டவசமாக அவர்களை கடந்துச்சென்ற ஒருவர் அவசர உதவிப் பிரிவினருக்கு தொடர்பை ஏற்படுத்தி இது குறித்து அறிவித்துள்ளார்.

ஸ்தலத்திற்கு விரைந்த பொலிஸாரும் அவசர சிகிச்சைப் பிரிவினரும் அந்த ஜோடியை காப்பாற்றினர். எனினும் இவர்களின் நடவடிக்கை குறித்து பொலிஸார் கடும் விசனம் தெரிவித்தனர்.

அப்பெண் அணிந்திருந்த கீழாடையையும் வெள்ளம் அடித்துச்சென்றது. அவருக்கு மீட்புப் பணியாளர்கள் ஆடைகளை  கொடுத்து உதவினர்.

இச்சம்பவத்தின்பின்,  இத்தகைய செக்ஸ் பொம்மைகளை மிதவைப் பொருட்களாக பயன்படுத்துவது புத்திசாலித்தனமான நடவடிக்கை அல்ல என குயின்ஸ்லாந்து மாநில பொலிஸார் பகிரங்க அறிவிப்பொன்றை விடுத்துள்ளமை குறிப்பிடத்தக்கது.