சாக்கடை மூடிகளுக்காக விசேட பூஜை

வீதிகளின் சாக்கடை வாயில்களில் பொருத்தப்படும் மூடிகளுக்கு ஆசிர்வாதம் கோரி விசேட பூஜையொன்று போலந்தில் நடத்தப்பட்டுள்ளது.

இரும்புத் திருடர்களால் இச்சாக்கடை மூடிகள் திருடப்படாமல் இருக்க வேண்டுமென்பதற்காகவே இப்பூஜை நடத்தப்பட்டது.

போலந்தின் லோட்ஸ் நகரத்திலுள்ள 4000 சாக்கடை மூடிகளுக்குப் பதிலாக புதிய மூடிகளை பொருத்துவதற்கு அம்மாநகர சபை உறுப்பினர்கள் தீர்மானித்தனர். அதேவேளை இம்மூடிகள் வீதிகளில் பொருத்தப்படுவதற்குமுன், அவை திருடப்படாமல் இருக்க வேண்டுமென்பதற்காக தேவாலயத்தில் பூஜை நடத்தவும் தீர்மானிக்கப்பட்டது.

இந்நகரத்தின் சுத்திகரிப்பு பிரிவுத் தலைவர் வுலோட்ஸ்மீர்ஸ் டோமஸ்வ்ஸ்கி இதுதொடர்பாக கூறுகையில், 'லோட்ஸ் நகரின் புனித காப்பாளராக சென் பௌஸ்டினா விளங்குகிறார். அவர் வீதியில் சென்று ஏழைகளுக்கு உதவியவர். இந்த சாக்கடை மூடிகளை ஆசிர்வதிக்கச் செய்வதன் மூலம் அவரின் அருளை நகர வீதிகள் எங்கும் பரப்புகிறோம்' என்றார்.

ஆனால் ஒரு மாதத்தின் பின்னர் திருடர்களால் ஒரு மூடிதானும் விட்டுவைக்கப்படுமா என்பது சந்தேகம் என லோட்ஸ் நகரவாசிகள் சிலர் தெரிவித்தாக போலந்து ஊடகமொன்று செய்தி வெளியிட்டுள்ளது.