இரண்டாவது திருமணத்துக்கு தயாராகும் சோனியா

'என்னை புரிந்து கொண்டவர் கிடைத்தால் இரண்டாவது திருமணம் செய்து கொள்வேன்'என நடிகை சோனியா அகர்வால் கூறியுள்ளார்.

சோனியா அகர்வாலுக்கு தற்போது 33 வயது ஆகிறது. அவரை மீண்டும் திருமணம் செய்து கொள்ளும்படி நெருக்கமானவர்கள் வற்புறுத்தி வருகின்றனர். இதுகுறித்து கூறும்போது இரண்டாவது திருமணத்துக்கு ஓ.கே. சொல்லியுள்ளார்.

''நான் தற்போது தனியாக தான் இருக்கிறேன். விருந்து நிகழ்ச்சிகளில் பங்கேற்று மற்றவர்களோடு நட்புடன் பழகி தனிமையை போக்குகிறேன். எனக்கு மீண்டும் திருமணம் செய்து கொள்ள விருப்பம் உள்ளது. என்னை புரிந்து கொண்டவர் கிடைத்தால் இரண்டாவது திருமணம் செய்து கொள்வேன்'' என்று தடாலடியாக கூறியுள்ளார்.

காதல் கொண்டேன் திரைப்படம் மூலம் 2003ஆம் ஆண்டு தமிழ் திரையுலகில் அறிமுகமான சோனியா அகர்வால் கோவில், மதுர, 7ஜி ரெயின்போ காலனி, திருட்டு பயலே, புதுப்பேட்டை உள்ளிட்ட திரைப்படங்களில் நடித்தார். 

இந்த நிலையில் இயக்குநர் செல்வராகவனை 2006ஆம் ஆண்டு திடீரென திருமணம் செய்து கொண்டார். 2010ஆம் ஆண்டு இருவரும் விவாகரத்து செய்து பிரிந்து விட்டனர். 

அதன்பிறகு சோனியா அகர்வால் மீண்டும் சினிமாவில் நடிக்க ஆரம்பித்தார். விவேக் ஜோடியாக நடித்த 'பாலக்காட்டு மாதவன்' திரைப்படம் தற்போது வெளியாகியுள்ளமை குறிப்பிடத்தக்கது.