நீதிபதியை விடுவிக்க சுமந்திரன் கடும் எதிர்ப்பு (வீடியோ)

அம்பாறை மேல் நீதிமன்ற நீதிபதி அந்தனி ஜெயலக்ஷி டி சில்வாவுக்கு எதிரான குற்றவியல் வழக்கில், அவரை விடுவிக்குமாறு சட்டமா அதிபர் திணைக்களம் வழங்கிய ஆலோசனைக்கு பாதிக்கப்பட்ட தரப்பு சட்டத்தரணி எம்.ஏ. சுமந்திரன் நீதிமன்றில் கடும் ஆட்சேபனை தெரிவித்தார்.

வழக்கின் பின்னணி
2022 ஆம் ஆண்டு தொழிலதிபர் மஹாதேவன் முரளிதரனால் அளிக்கப்பட்ட முறைப்பாட்டின் அடிப்படையில், தண்டனைச் சட்டக்கோவையின் 486 மற்றும் 344 ஆகிய பிரிவுகளின் கீழ் (குற்றவியல் மிரட்டல் மற்றும் அரச அதிகாரியின் கடமைக்கு இடையூறு விளைவித்தல்) பெரியநீலாவணை பொலிஸாரால் இந்த வழக்குத் தொடரப்பட்டது.

சட்டமா அதிபர் திணைக்களம் மீது சுமத்தப்பட்ட குற்றச்சாட்டுகள்
இந்த வழக்கு நேற்று (30) விசாரணைக்கு எடுத்துக்கொள்ளப்பட்ட போது, பாதிக்கப்பட்ட தரப்பு சார்பில் ஆஜரான ஜனாதிபதி சட்டத்தரணி எம்.ஏ. சுமந்திரன் முன்வைத்த முக்கிய வாதங்கள் வருமாறு:

அக்கறை முரண் (Conflict of Interest): சந்தேகநபரான நீதிபதி சுமார் 20 ஆண்டுகள் சட்டமா அதிபர் திணைக்களத்தில் பணியாற்றியவர். எனவே, அதே திணைக்களத்தைச் சேர்ந்த மேலதிக சொலிசிட்டர் ஜெனரல் ஜனக் பண்டார இந்த வழக்கில் ஆஜராவது முறையற்றது.

விரைவான விடுதலை ஆணை: நூற்றுக்கணக்கான வழக்குகள் தேங்கிக் கிடக்கும் நிலையில், இந்த நீதிபதியை மட்டும் விடுவிக்குமாறு சட்டமா அதிபர் திணைக்களம் மிக விரைவாக ஆலோசனை வழங்கியது ஏன்? என அவர் கேள்வி எழுப்பினார்.

வாக்குமூலத்தில் குளறுபடி: நீதிமன்றம் உத்தரவிட்டும் சந்தேகநபரிடம் நேரடியாக வாக்குமூலம் பெறப்படவில்லை. மாறாக, அவரது மெய்ப்பாதுகாவலர் மூலமே தகவல்கள் பெறப்பட்டுள்ளன. வாக்குமூலச் சுருக்கத்தை மன்றுக்குச் சமர்ப்பிக்காமல் நேரடியாகச் சட்டமா அதிபருக்கு அனுப்பியது பாரதூரமான விதிமீறலாகும்.

"சட்டமா அதிபரின் ஆலோசனை பொலிஸாரைக் கட்டுப்படுத்தலாம், ஆனால் அது நீதிமன்றத்தைக் கட்டுப்படுத்தாது. குற்றவியல் நடைமுறைக்கோவை பிரிவு 120(3)-இன் படி இறுதி முடிவெடுக்கும் அதிகாரம் நீதவானுக்கே உண்டு." என சுமந்திரன் வாதிட்டார்.

சட்டமா அதிபர் திணைக்களத்தின் பதில்
விடுவிப்பு ஆலோசனையை நீதவான் பின்பற்றத் தவறினால், அது எதிர்காலத்தில் தேவையற்ற சட்டச் சிக்கல்களை (Opening floodgates) உருவாக்கும் என மேலதிக சொலிசிட்டர் ஜெனரல் வாதிட்டார். ஏதேனும் ஆட்சேபனைகள் இருப்பின் அதனை மேன்முறையீட்டு நீதிமன்றத்தில் தீர்த்துக்கொள்ள வேண்டும் எனவும் அவர் குறிப்பிட்டார்.

நீதிமன்றின் உத்தரவு
இருதரப்பு வாதங்களையும் கேட்ட நீதவான் கே.எல்.எம். சாஜித் பின்வரும் உத்தரவுகளைப் பிறப்பித்தார்:

சந்தேகநபரின் வாக்குமூலம் உள்ளிட்ட முழுமையான அறிக்கையை பொலிஸார் மன்றுக்குச் சமர்ப்பிக்க வேண்டும். வழக்கு விசாரணை எதிர்வரும் ஏப்ரல் 20, 2026 வரை ஒத்திவைக்கப்பட்டது.

மேலதிக நடவடிக்கைகள் குறித்த தீர்மானம் மே 04, 2026 அன்று அறிவிக்கப்படும்.

இவ்விசாரணையின் போது ஜனாதிபதி சட்டத்தரணி எம்.ஏ. சுமந்திரனுடன் என். சிவரஞ்சித், ஏ.எல். ஆசாத் உட்படப் பல சட்டத்தரணிகள் ஆஜராகியிருந்தனர். பெரியநீலாவணை பொலிஸ் நிலையப் பொறுப்பதிகாரி பி. கஜேந்திரன் தலைமையிலான குழுவினர் மேலதிக விசாரணைகளை முன்னெடுத்து வருகின்றனர்