சம்பளம் வழங்கப்படாததால் இ.போ.ச ஊழியர்கள் வேலை நிறுத்தம்

(எம்.ஐ.எம்.அஸ்ஹர்)

கடந்த இரண்டு மாதகாலமாக சம்பளம் வழங்கப்படாமையினால் அம்பாறை, தெஹியத்த கண்டிய இ.போ.ச ஊழியர்கள் கடந்த திங்கட்கிழமை முதல் வேலை நிறுத்தத்தில் ஈடுபட்டுள்ளனர்.

இந்த வேலை நிறுத்தத்தில் இ.போ.ச தெஹியத்த கண்டிய டிப்போவைச் சேர்ந்த 158 ஊழியர்களும் உத்தியோகத்தர்களும் ஈடுபட்டுள்ளனர்.

கணக்காளர் சம்பளப் பணத்தை கட்டம் கட்டமாக தருவதற்கு இணங்கியபோது முழு சம்பளப் பணத்தையும் தரும்படி கோரியே இந்த வேலை நிறுத்தப் போராட்டம் ஆரம்பிக்கப்பட்டது.

இந்த வேலை நிறுத்தத்தினால் தற்போது நடைபெற்றுக் கொண்டிருக்கும் க.பொ.த (உ/த) பரீட்சைக்கு தோற்றும் மாணவர்களும் அரச அலுவலகம் மற்றும் தனியார்துறை உத்தியோகத்தர்களும் ஊழியர்களும் பொதுமக்களும் மிகுந்த சிரமங்களை எதிர்கொண்டுள்ளமை குறிப்பிடத்தக்கது.