ஆசிரியர் இடமாற்றம் குறித்து ஜனாதிபதியிடம் எதிர்ப்பு தெரிவிக்க கிழக்கு மாகாண அரச எம்.பிக்கள் தீர்மான

(றிப்தி அலி)

ஜனாதிபதி மஹிந்த ராஜபக்ஷ தலைமையில் நாளை திங்கட்கிழமை இரவு நடைபெறவுள்ள அரசதரப்பு நாடாளுமன்ற குழு கூட்டத்தில் சர்ச்சைக்குரிய  கிழக்கு மாகாண ஆசிரியர் இடமாற்றத்திற்கான எதிர்ப்பினை கிழக்கு மாகாண நாடாளுமன்ற உறுப்பினர்கள் தெரிவிக்கவுள்ளனர்.

பல்வேறு குளறுபடிகள் இடம்பெற்றுள்ள இந்த இடமாற்றத்தை உனடியாக இடைநிறுத்தும்படி ஜனாதிபதி மஹிந்த ராஜபக்ஷவிடம் தானும் ஏனைய கிழக்கு மாகாண நாடாளுமன்ற உறுப்பினர்களும் கோரிக்கை விடுக்கவுள்ளதாக ஸ்ரீலங்கா முஸ்லிம் காங்கிரஸ் நாடாளுமன்ற உறுப்பினர் எச்.எம்.எம்.ஹரீஸ் - தமிழ்மிரர் இணையத்தளத்திற்கு தெரிவித்தார்.

கடந்த 6ஆம் திகதி இடம்பெற்ற அரசதரப்பு நாடாளுமன்ற குழு கூட்டத்தின் போதும் கிழக்கு மாகாண ஆசிரியர் இடமாற்றம் தொடர்பில் ஜனாதிபதி மஹிந்த ராஜபக்ஷவிடம் அமைச்சர் ஏ.எல்.எம்.அதாவுல்லா மற்றும் நாடாளுமன்ற உறுப்பினர் பைசால் காசீம் ஆகியோரால் எதிர்ப்பு தெரிவிக்கப்பட்டமை குறிப்பிடத்தக்கது.  

இதேவேளை, மாகாண அமைச்சரவையின் அங்கீகாரத்துடன் இடம்பெறும் சர்ச்சைக்குரிய  கிழக்கு மாகாண ஆசிரியர் இடமாற்றத்திற்கு எதிரான கண்டனப் பிரேரணையொன்று எதிர்வரும் 21ஆம் திகதி செவ்வாய்க்கிழமை கிழக்கு மாகாண சபையில் முன்வைக்கப்படவுள்ளது.

எவ்வாறாயினும், கிழக்கு மாகாண ஆசிரியர் இடமாற்றத்தை யாராலும் தடுத்த நிறுத்த முடியாது என கிழக்கு மாகாண முதலமைச்சர் சிவநேசதுரை சந்திரகாந்தன் தெரிவித்தமை குறிப்பிடத்தக்கது.