அச்சுறுத்தலுக்குள்ளாகும் வாழ்வாதாரம்

இலங்கையின் தற்போதைய பொருளாதார நெருக்கடிச் சூழலில், மின்சாரக் கட்டணங்கள் மீண்டும் அதிகரிக்கப்பட்டுள்ளமையானது சாதாரண பொதுமக்கள் முதல் பாரிய முதலீட்டாளர்கள் வரை அனைவர் மத்தியிலும் பெரும் அதிர்வலைகளை ஏற்படுத்தியுள்ளது. நாட்டின் பொருளாதாரத்தை மீளக்கட்டியெழுப்ப எடுக்கும் முயற்சிகளுக்கு இக்கட்டண உயர்வு ஒரு முட்டுக்கட்டையாகவே அமையும் என்பதில் மாற்றுக் கருத்தில்லை.

ஏற்கனவே அத்தியாவசியப் பொருட்களின் விலை உயர்வால் திணறிக்கொண்டிருக்கும் சாதாரண மின் பாவனையாளர்களுக்கு, இக்கட்டண அதிகரிப்பு பாரிய இடியாகும். ஒரு நடுத்தரக் குடும்பத்தின் மாதாந்தச் செலவீனங்களில் கணிசமான பகுதி மின்சாரக் கட்டணத்திற்கே செலவிடப்பட வேண்டியுள்ளதால், மக்களின் கொள்வனவுச் சக்தி மேலும் வீழ்ச்சியடையும். இது வறுமைக் கோட்டிற்கு கீழ் உள்ள மக்களை இருளுக்குள் தள்ளும் அபாயத்தை ஏற்படுத்தியுள்ளது.

நாட்டின் முதுகெலும்பாக விளங்கும் தொழிற்சாலைகள் மற்றும் சிறு கைத்தொழில் முயற்சியாளர்கள் இக்கட்டண உயர்வால் நேரடியாகப் பாதிக்கப்படவுள்ளனர். உற்பத்திச் செலவு அதிகரிப்பதால், உள்நாட்டுத் தயாரிப்புகளின் விலைகளும் அதிகரிக்கப்படும். குறிப்பாக, சிறு மற்றும் நடுத்தர அளவிலான கைத்தொழில்கள்   நட்டத்தை ஈடுகட்ட முடியாமல் மூடப்படும் அபாயத்தைச் சந்தித்துள்ளன. இது பாரிய வேலையில்லாப் பிரச்சினையையும், பொருளாதாரத் தேக்கநிலையையும் உருவாக்கும்.

வெளிநாட்டு முதலீடுகளை ஈர்ப்பதற்கும், ஏற்றுமதியை ஊக்குவிப்பதற்கும் குறைந்த செலவிலான மின்சாரம் மற்றும் உட்கட்டமைப்பு வசதிகள் அவசியமானவை. பிராந்தியத்திலுள்ள ஏனைய நாடுகளுடன் ஒப்பிடுகையில் இலங்கையில் மின்சாரக் கட்டணம் உயர்வடையும் போது, புதிய முதலீட்டாளர்கள் இலங்கையைத் தவிர்த்து வேறு நாடுகளை நோக்கிச் செல்லும் நிலை ஏற்படும். இது நாட்டின் எதிர்காலப் பொருளாதார ஸ்திரத்தன்மைக்கு ஆரோக்கியமானதல்ல.

மின்சார சபையின் நட்டத்தை ஈடுகட்டக் கட்டணத்தை அதிகரிப்பதாகக் கூறப்பட்டாலும், அது மக்களின் வாழ்வாதாரத்தைப் பலிகொடுப்பதாக இருக்கக் கூடாது. மாற்று எரிசக்தி மூலங்களை நோக்கி விரைவாக நகர்வதும், வினைத்திறனற்ற முகாமைத்துவத்தைச் சீர் செய்வதுமே நிலையான தீர்வாக அமையும். இல்லையெனில், மின்கட்டண உயர்வு என்பது இலங்கையின் கைத்தொழில் துறையை அழித்து, மக்களை மேன்மேலும் வறுமைக்குள் தள்ளும் ஒரு கருவியாகவே பார்க்கப்படும்.

 அரசின் இந்தத் தீர்மானம் எரிசக்தி பாதுகாப்பில் நீண்டகாலப் பாதிப்பை ஏற்படுத்தும். மின்சாரச் செலவு அதிகரிப்பால் கல்வி நிறுவனங்கள் மற்றும் சுகாதார சேவைகளின் பராமரிப்புச் செலவுகளும் உயரும். இது ஒட்டுமொத்த சமூகக் கட்டமைப்பிலும் பணவீக்கத்தை ஊக்கப்படுத்தும். எனவே, கட்டண அதிகரிப்புக்கு அப்பாற்பட்டு, சூரியசக்தி போன்ற புதுப்பிக்கத்தக்க வலுசக்தித் திட்டங்களுக்கு அரசாங்கம் முன்னுரிமை அளிப்பதன் மூலமே பொருளாதாரத்தைச் சரிவிலிருந்து மீட்க முடியும்.

11.05.2026