கவச வாகனத்தை ஓட்டிய கிம் ஜொங்-உன்னின் மகள்

வடகொரிய அதிபர் கிம் ஜொங்-உன்னின் இளம் வயது மகள், இராணுவப் பயிற்சியின் போது தனது தந்தையுடன் இணைந்து கவச வாகனத்தைச் செலுத்தும் காட்சிகள் வெளியாகியுள்ளன. இது, கிம் ஜொங்-உன்னிற்குப் பிறகு அவரே நாட்டின் அடுத்த தலைவராக உருவாக்கப்படுகிறாரா என்ற எதிர்பார்ப்பை சர்வதேச அளவில் மேலும் அதிகரித்துள்ளது.

அரசு ஊடகங்கள் வெளியிட்டுள்ள காணொளியில், கிம் மற்றும் அவரது மகள் இருவரும் தங்களின் வழக்கமான கறுப்பு நிறத் தோல் அங்கிகளை (Black Leather Jackets) அணிந்துள்ளனர். கிம் ஜூ-ஆயே (Kim Ju-ae) என அழைக்கப்படும் அந்தச் சிறுமி, ஆலிவ் பச்சை நிறக் கவச வாகனத்தைச் செலுத்துவதும், அதன் மேல்பகுதியில் கிம் ஜொங்-உன் புன்னகையுடன் அமர்ந்திருப்பதும் காட்சிகளில் பதிவாகியுள்ளது.

  இது குறித்து தென்கொரிய பாதுகாப்பு வலையமைப்பின் (Korea Defence Network) நிபுணர் லீ இல்லூ (Lee Illwoo) கருத்துத் தெரிவிக்கையில், "அவர் குறைந்த வேகத்தில் நேராக மட்டுமே வாகனத்தைச் செலுத்தினார். நவீன கவச வாகனங்களை ஓட்டுவது எளிதானது என்பதாலும், தட்டையான தரைப்பகுதியில் அவர் பயணித்ததாலும் இது அவருக்கு எளிதாக இருந்திருக்கலாம்," எனக் குறிப்பிட்டுள்ளார்.

  ஏவுகணைச் சோதனைகள் மற்றும் துப்பாக்கிச் சூட்டுப் பயிற்சிகளைத் தொடர்ந்து, கடந்த வெள்ளிக்கிழமை நடைபெற்ற பீரங்கிப் படைகள் மற்றும் காலாட்படைப் பயிற்சிகளையும் கிம் மேற்பார்வையிட்டதாக அதிகாரப்பூர்வ கொரிய மத்திய செய்தி நிறுவனம் (KCNA) தெரிவித்துள்ளது.

2022 நவம்பரில் கண்டம் விட்டு கண்டம் பாயும் ஏவுகணைச் சோதனையின் போது முதல்முறையாகப் பொதுவெளியில் தோன்றிய கிம் ஜூ-ஆயே, அதன் பின்னர் ஆயுதச் சோதனைகள், இராணுவ அணிவகுப்புகள் மற்றும் தொழிற்சாலைத் திறப்பு விழாக்கள் எனப் பல முக்கிய நிகழ்வுகளில் தனது தந்தையுடன் தொடர்ந்து பங்கேற்று வருகிறார்.

தலைமைத்துவ மாற்றம் குறித்த விவாதம்: ஆரம்பத்தில் வடகொரியாவின் ஆணாதிக்கக் கலாச்சாரம் மற்றும் அந்தச் சிறுமியின் வயது காரணமாக அவர் தலைவராக வருவாரா எனத் தென்கொரிய அதிகாரிகள் சந்தேகம் வெளியிட்டனர். எனினும், அரசு ஊடகங்களில் அவருக்கு அளிக்கப்படும் அதீத முக்கியத்துவம் தற்போது அந்த நிலைப்பாட்டை மாற்றியுள்ளது.

இருப்பினும், வடகொரிய அரசு ஊடகங்கள் இதுவரை அவரது பெயரைப் பகிரங்கமாக வெளியிடவில்லை. அவரை "மதிக்கத்தக்க" அல்லது "மிகவும் அன்பிற்குரிய" குழந்தை என்றே விவரித்து வருகின்றன.