சென்ரல், கிறாஸ்கோப்பர்ஸ் அணிகள் வெற்றி

Super User / 2014 மே 27 , மு.ப. 06:51 - 0 - {{hitsCtrl.values.hits}}

- குணசேகரன் சுரேன்
யாழ்ப்பாணம் பிறிமியர் லீக் இருபது – 20 துடுப்பாட்டச் சுற்றுப்போட்டியில் சனிக்கிழமை (24) நடைபெற்ற போட்டிகளில் சென்ரல் விளையாட்டுக்கழக அணியும் கிறாஸ்கோப்பர்ஸ் விளையாட்;டுக்கழக அணியும் வெற்றிபெற்றன.

யுவ பவுண்டேஸன் நிறுவனத்தின் அனுசரணையிலான யாழ்ப்பாணம் பிறிமியர் லீக் இருபது – 20 துடுப்பாட்டச் சுற்றுப்போட்டி கடந்த 10 ஆம் திகதி முதல் யாழ்ப்பாணம் இந்துக் கல்லூரி மைதானத்தில் நடைபெற்று வருகின்றது.

மேற்படி துடுப்பாட்டச் சுற்றுப்போட்டியில் யாழ். மாவட்டத்தினைச் சேர்ந்த 18 துடுப்பாட்ட அணிகள் பங்குபற்றுகின்றன.

றொகானின் சகலதுறையாட்டத்தினால் சென்ரல் வெற்றி

சனிக்கிழமை (24) இடம்பெற்ற ஆட்டத்தில் சென்ரல் விளையாட்டுக்கழக அணியினை எதிர்த்து திருநெல்வேலி இந்து இளைஞர் மன்ற அணி மோதியது.

நாணயச் சுழற்சியில் வென்று முதலில் துடுப்பெடுத்தாடிய சென்ரல் அணி எஸ்.றொகானின் அதிரடியான 81 ஓட்டங்களின் உதவியுடன் 20 பந்துபரிமாற்றங்களில் 5 இலக்குகளை இழந்து 190 ஓட்டங்களைப் பெற்றது.

துடுப்பாட்டத்தில் எஸ்.றொகான் ஆட்டமிழக்காமல் 81, பி.பாலேந்திரா 42 ஓட்டங்களையும் பெற்றுக்கொடுத்தனர்.
பந்துவீச்சில் திருநெல்வேலி அணி சார்பாக எஸ்.நிசாந்தன் 3 இலக்குகளைக் கைப்பற்றினார்.

191 ஓட்டங்கள் எடுத்தால் வெற்றியென்ற இலக்குடன் பதிலுக்குத் துடுப்பெடுத்தாடக் களமிறங்கிய திருநெல்வேலி இந்து இளைஞர் அணி, 20 பந்துபரிமாற்றங்களில் 7 இலக்குகளை இழந்து 129 ஓட்டங்களை மாத்திரம் பெற்றது. துடுப்பாட்டத்தில் எஸ்.சுதர்சன் 24, என்.சுதாகரன் 22 ஓட்டங்களைப் பெற்றுக்கொடுத்தனர்.

பந்துவீச்சில் சென்ரல் அணி சார்பாக துடுப்பாட்டத்தில் பிரகாசித்த எஸ்.றொகான் 4 பந்துபரிமாற்றங்கள் வீசி 28 ஓட்டங்களை விட்டுக்கொடுத்து 6 இலக்குகளைக் கைப்பற்றினார்.

இவ்வருட ஜே.பி.எல் போட்டிகளில் அதிக ஓட்டங்கள் (81), அதிக இலக்குகள் (06) கைப்பற்றிய றொகான் ஆட்டநாயகனாகத் தெரிவு செய்யப்பட்டார்.

பலம்மிக்க ஜொலிஸ்ரார் அணியினை வீழ்த்திய கிறாஸ்கோப்பர்ஸ்

இரண்டாவது போட்டியில் ஜொலிஸ்ரார்ஸ் அணியினை எதிர்த்து கிறாஸ்கோப்பர்ஸ் அணி மோதியது. நாணயச் சுழற்சியில் வென்ற கிறாஸ்கோப்பர்ஸ் அணி முதலில் ஜொலிஸ்ரார்ஸ் அணியினை துடுப்பெடுத்தாடுமாறு பணித்தது.

அதற்கிணங்க களமிறங்கிய ஜொலிஸ்ரார்ஸ் அணி 19.3 பந்துபரிமாற்றங்களில் 124 ஓட்டங்களுக்குச் சகல இலக்குகளையும் இழந்தது. துடுப்பாட்டத்தில் எஸ்.சஜீபன் 29 ஓட்டங்களைப் பெற்றுக்கொடுத்தார்.
பந்துவீச்சில் கிறாஸ்கோப்பர்ஸ் அணி சார்பாக என்.ஜனந்தன் 6 இலக்குகளையும், எஸ்.மதுசன், என்.கஜதீபன் தலா 2 இலக்குகளையும் கைப்பற்றினார்கள்.

தொடர்ந்து 125 ஓட்டங்கள் பெற்றால் வெற்றியென்ற இலக்குடன் பதிலுக்குத் துடுப்பெடுத்தாடக் களமிறங்கிய கிறாஸ்கோப்பர்ஸ் அணி 17.3 பந்துபரிமாற்றங்களில் 4 இலக்குகளை மாத்திரம் இழந்து வெற்றியிலக்கை அடைந்தது.

துடுப்பாட்டத்தில் ஆர்.டிலோசன் 42, எஸ்.அஜித் ஆட்டமிழக்காமல் 34 ஓட்டங்களைப் பெற்றுக்கொடுத்தனர்.

பந்துவீச்சில் ஜொலிஸ்ரார்ஸ் அணி சார்பாக டி.ஜனார்த்தனன் 2 இலக்குகளைக் கைப்பற்றினார்.
இந்தப் போட்டியின் நாயகனாக கிறாஸ்கோப்பர்ஸ் அணியின் என்.ஜனந்தன் தெரிவு செய்யப்பட்டார்.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .