ஸ்ரைக்கர்ஸைத் தோற்கடித்த கிங்ஸ்

இலங்கையின் உள்ளூர் இருபதுக்கு – 20 தொடரான லங்கா பிறீமியர் லீக் தொடரில், பல்லேகலவில் திங்கட்கிழமை (07) யநடைபெற்ற கொழும்பு ஸ்ரைக்கர்ஸ் உடனான போட்டியில் நடப்புச் சம்பியன்களான ஜஃப்னா கிங்ஸ் வென்றது.

இப்போட்டியில் முதலில் துடுப்பெடுத்தாடிய ஸ்ரைக்கர்ஸ், பதும் நிஸங்கவின் 36 (35), லஹிரு உதாரவின் 29 (25), மொஹமட் நவாஸின் 27 (20), அணித்தலைவர் பாபர் அஸாமின் 24 (21), சாமிக கருணாரத்னவின் ஆட்டமிழக்காத 21 (18) ஓட்டங்களோடு 20 ஓவர்களில் 8 விக்கெட்டுகளை இழந்து 146 ஓட்டங்களைப் பெற்றது. பந்துவீச்சில், டுனித் வெல்லலாகே 3-0-9-2, டில்ஷான் மதுஷங்க 4-0-23-2, மகேஷ் தீக்‌ஷன 4-0-21-1 என்ற பெறுதிகளைக் கொண்டிருந்தனர்.

பதிலுக்கு 147 ஓட்டங்களை வெற்றியிலக்காகக் கொண்டு துடுப்பெடுத்தாடிய கிங்ஸ், நிஹ்சான் மதுஷ்கவின் 46 (32), ரஹ்மனுல்லாஹ் குர்பாஸின் 39 (21), அணித்தலைவர் திஸர பெரேராவின் 17 (07), தெளஹிட் ஹிரிடோயின் ஆட்டமிழக்காத 14 (09) ஓட்டங்களோடு 14.3 ஓவர்களில் 4 விக்கெட்டுகளை இழந்த நிலையில் வெற்றியிலக்கையடைந்தது. பந்துவீச்சில் நசீம் ஷா 3.3-0-22-2 என்ற பெறுதியைக் கொண்டிருந்தார்.

இப்போட்டியின் நாயகனாக வெல்லலாகே தெரிவானார்.

இந்நிலையில் முன்னதாக நடைபெற்ற கோல் டைட்டான்ஸுடனான போட்டியில் பி-லவ் கண்டி வென்றது.