'முப்படையினரை பாதுகாப்பேன்'

முப்படைகளின் உயர்மட்டத்திலிருந்து அடிமட்டம் வரையிலான அனைத்து அங்கத்தவர்களதும் பாதுகாப்புக்காகவும்  அபிமானத்துக்காகவும் தான் முன்னிற்பதாக ஜனாதிபதி மைத்திரிபால சிறிசேன வலியுறுத்தினார்.

முப்படைகளின் பிரதானி என்ற ரீதியிலும் பாதுகாப்பு அமைச்சர் என்ற ரீதியிலும் தனது பொறுப்புக்கள் தொடர்பாக எந்தவொரு சந்தர்ப்பத்திலும் குறைத்து மதிப்பிட்டு தான் நடவடிக்கை மேற்கொள்வதில்லையெனவும் ஜனாதிபதி குறிப்பிட்டார்.

பனாகொடை இராணுவ உள்ளக விளையாட்டரங்கில் திங்கட்கிழமை(22) இடம்பெற்ற 09ஆவது பாதுகாப்பு சேவை விளையாட்டு போட்டியின் பூர்த்தி விழாவில் உரையாற்றியபோதே ஜனாதிபதி இவ்வாறு குறிப்பிட்டார்.

எமது பாதுகாப்புப் படையின் கௌரவத்தையும் அபிமானத்தையும்  பாதுகாத்து அவர்களை உலகில் ஏற்றுக்கொள்ளப்பட்ட சிறந்த முப்படைகளாக மாற்றுவதற்கு அரசாங்கம் தன்னை அர்ப்பணிப்பதாக ஜனாதிபதி தெரிவித்தார்.  

இன்று அரசியல் மேடைகளிலும் ஒரு சில ஊடகங்களிலும் பேசப்படும் படைவீரர்களை தண்டித்தல் எனும் கூற்றினைத் தான் வன்மையாக நிராகரிப்பதாகத் தெரிவித்த ஜனாதிபதி, குறுகிய அரசியல் நோக்கங்களை விட தாய்நாட்டின் அபிமானத்துக்காக பணியாற்றுமாறு அவர்களுக்கு அழைப்பு விடுப்பதாகவும் குறிப்பிட்டார்.

பிராந்திய மற்றும் சர்வதேச ரீதியிலான போட்டிகளில் கலந்துகொள்ளச் செல்லும் எமது நாட்டு வீரர், வீராங்கனைகளது ஆற்றல் மற்றும் திறமைகளை விருத்திசெய்வதற்கு எதிர்காலத்தில் கூடுதலான அனுசரணைகளை வழங்குவதற்கு அரசாங்கம் எதிர்பார்த்துள்ளது.

வீராங்கனைகளின் தரம் மற்றும் பண்புகளை மேம்படுத்துவதற்காக சர்வதேச விளையாட்டு குழுமத்தினை நாட்டில் ஏற்படுத்துதல், அதற்குத்  தேவையான தொழில்நுட்ப அறிவு, பயிற்றுவிப்பாளர்கள் மற்றும் ஏனைய வசதிகளை வழங்குவதற்காக கூடுதலான நிதி ஒதுக்கீடுகளை மேற்கொள்வதற்கான பிரேரணையொன்றை எதிர்காலத்தில் அமைச்சரவையில் சமர்ப்பிப்பதாகவும் ஜனாதிபதி தெரிவித்தார்.