ஒரே பார்வையில் கொரோனா...

கொரோனா வைரஸ் தாக்கம் தொடர்பில் தற்போது வரையிலும் கிடைத்துள்ள செய்திகளின் துளிகள் சிலவற்றை இங்கு காணலாம். 

* கொரோனா வைரஸிலிருந்து மீண்டவர்களிடமிருந்து, வைரஸ் மீண்டும் தொற்றும் ஆபத்தில்லையென தேசிய தொற்றுநோய் வைத்தியசாலையின் மருத்துவர் ஆனந்த விஜயவிக்கிரம தெரிவித்தார்.    

* நோய் அறிகுறிகள் தென்படாத கொரோனா தொற்றுக்குள்ளானவரின் மூலம் வைரஸ் பரவும் ஆபத்து நிலை உயர் மட்டத்தில் காணப்படுவதாக தொற்று நோயியல் பிரிவு தெரிவித்துள்ளது.

* தனிமைப்படுத்தல் ஊரடங்கு நீக்கப்படினும் சுகாதார வழிமுறைகளை முறையாக கடைப்பிடிக்குமாறு, சுகாதார அமைச்சு, பொதுமக்களை கேட்டுக்கொண்டுள்ளது.

அத்தியாவசிய தேவைக்காக மாத்திரம் சமூகத்துக்குள் பிரவேசிக்குமாறும் வயோதிபர்கள், நோய்வாய்ப்பட்டவர்களை, வீட்டிலேயே இருக்குமாறும் சுகாதார அமைச்சு அறிவுறுத்தியுள்ளது.  

* ஊரடங்கு அமுலில் இருந்த காலப்பகுதியிலும் பார்க்க, ஊரடங்கு நீக்கப்பட்டதன் பின்னர், மக்கள் மிகுந்த பொறுப்புடன் செயற்பட வேண்டுமென, அரச வைத்திய அதிகாரிகள் சங்கத்தின் வைத்தியர் ஹரித அலுத்கே தெரிவித்தார். 

* சிலாபத்தில் உள்ள  மாவட்ட பொது வைத்தியசாலையில், இம்மாதம் 7ஆம் திகதி உயிரிழந்த நபருக்குக் கொரோனா வைரஸ் தொற்று இல்லையென சடலத்தின் மீதான பிசிஆர் பரிசோதனையிலே உறுதிப்படுத்தப்பட்டுள்ளது. 

* கொழும்பு மாவட்டத்திலேயே அதிகளவான கொரோனா வைரஸ் தொற்றாளர்கள் இனங்காணப்பட்டுகின்றனர் என கொரோனா பரவலைத் தடுப்பதற்கான தேசிய செயல்பாட்டு மைய்யம் தெரிவித்துள்ளதோடு, இரண்டாவதாக அதிகளவான கொரோனா வைரஸ் தொற்றாளர்கள், கம்பஹா மாவட்டத்தில் இனங்காணப்பட்டுகின்றனர் எனவும் தெரிவித்துள்ளது. 

* வத்தளை, ஹெந்தல பிரதேசங்களில் 20 தொற்றாளர்கள், நேற்று (08) இனங்காணப்பட்டுள்ளனர்.

* இரத்தினபுரி மாவட்டத்துக்குள் நேற்று வரை கொரோனா வைரஸ் தொற்றாளர்களின் எண்ணிக்கை 100ஆக அதிகரித்துள்ளதென, இரத்தினபுரி மாவட்ட செயலாளர் மாலனி லொக்குபோத்தாகம தெரிவித்தார். அத்துடன், 5,316 பேர் தனிமைப்படுத்தப்பட்டுள்ளனர் எனவும் அவர்  தெரிவித்தார்.

* பேலியகொட மீன் சந்தையில் இருந்து மீன் கொள்வனவு செய்து, அம்பலாங்கொட பிரதேசத்தில் விற்பனை செய்த, மீன் வியாபாரி உட்பட அவருடைய குடும்பத்தைச் சேர்ந்த 7 பேருக்கு கொரோனா வைரஸ் தொற்று உறுதியாகியுள்ளது. 

* மேல் மாகாண பொலிஸ் நிலையங்களில் பணிபுரியும் 256 பொலிஸ் அதிகாரிகளுக்கு கொரோனா வைரஸ் தொற்று உறுதிப்படுத்தப்பட்டுள்ளது. 

இவர்களில் 6 பேர் பூரண சுகமடைந்துள்ளனரெனவும் மேலும் 250 பேர் தொடர்ந்தும் சிகிச்சைப் பெற்று வருவதாகவும் சுகாதாரப் பிரிவினர் தெரிவித்துள்ளனர்.

அத்துடன், 317 பொலிஸார் தனிமைப்படுத்தல் நிலையங்களுக்கு அனுப்பி வைக்கப்பட்டுள்ளதுடன், 1,447 பொலிஸார் சுயதனிமையில் இருப்பதாகவும் சுகாதாரப் பிரிவினர் தெரிவித்துள்ளனர்.

* கொரோனா வைரஸ் தொற்றுக் காலப் பகுதியில், 2020.09.25ஆம் திகதி அல்லது அதற்குப் பின்னர் வழங்கப்பட்ட வாகனத் தண்டப்பணப் பத்திரத்துக்கு மேலதிக பணம் அறவீடு இல்லாமல் செலுத்த முடியுமென, தபால் மா அதிபதி ரஞ்சித் ஆரியரத்ன அறிவித்துள்ளார்.

* கொரோனா வைரஸ் தொற்றாளர்கள் அறுவர் அடையாளம் காணப்பட்டதையடுத்து, நிக்கவரட்டிய நகரிலுள்ள சகல வர்த்தக நிலையங்களையும் இன்றிலிருந்து (09) மூன்று நாள்கள் மூடுவதற்கு, நிக்கவரட்டிய வர்த்தக சங்கம் தீர்மானித்துள்ளது. 

* தீபாவளி பண்டிகையைக் கொண்டாடுவதற்குத் தேவையான பொருள்களைக் கொள்வனவு செய்வதற்காக நகருக்கு வருவோரின் தொகை அதிகரிக்கும் என்பதால், நுவரெலியா மாவட்டத்தின் பிரதான நகரங்களை, இம்மாதம் 16ஆம் திகதி வரை மூடுவதற்கு, பிரதேசங்களுக்குப் பொறுப்பான பொலிஸாரும் உள்ளூராட்சி மன்றங்களும் இணைந்து ஆலோசித்து வருகின்றன. 

* தனிமைப்படுத்தல் ஊரடங்கு உத்தரவு அமுல்படுத்தப்பட்டு, இன்று (09) காலை நீக்கப்படும் வரை, ஊரடங்கு உத்தரவை மீறிய 2,923 பேர் மேல் மாகாணத்தில் கைதுசெய்யப்பட்டுள்ளனரென, பொலிஸ் ஊடகப் பேச்சாளர் பிரதி பொலிஸ்மா அதிபர் அஜித் ரோஹண தெரிவித்தார். 

* கடந்த வெள்ளிக்கிழமை அடையாளம் காணப்பட்ட கொரோனா லைரஸ் தொற்றாளி, தனிமைப்படுத்தலை மீறிச் சுற்றித் திரிந்தமை, அம்பலமானமையை அடுத்து, கிளிநொச்சி மாவட்டத்தின் ஜெயபுரம் வடக்கு, தெற்கு பிரதேசங்கள் முற்றாக முடக்கப்பட்டுள்ளன. 

* கொழும்பு மத்திய தபால் பரிமாறல் சேவையில் வரையறுக்கப்பட்ட கடமைகள் சிலவற்றைச் செயற்படுத்துவதற்குத் தீர்மானிக்கப்பட்டுள்ளதாகத் தபால் மா அதிபர் அறிவித்துள்ளார். 

இதன்படி, சர்வதேச விரைதூதர் தபால் சேவை ( EMS Courier), வர்த்தக தபால் (Business mail),உள்ளூர் விரைதூதர் தபால் சேவை ( SL Post Courier) இன்று (09) முதல் செயற்பாடுகளுக்காகத் திறக்கப்பட்டுள்ளன. 

* மினுவங்கொட மற்றும் பேலியகொட கொத்தணியில், கொரோனா வைரஸ் தொற்றுக்கு உள்ளானவர்களின் எண்ணிக்கை 10,451 ஆக அதிகரித்துள்ளதாக அரசாங்கத் தகவல் திணைக்களம் தெரிவித்துள்ளது. 

* மொத்த விற்பனை பொருளாதார மையங்களை மீளத் திறந்து வைக்கும் செயல்முறைக்கு அமைவாக, பொதுமக்கள் நலன் கருதி, நாரஹென்பிட்ட பொருளாதார மத்திய நிலையத்தின் நாளாந்தப் பணிகளை மீள ஆரம்பிக்கும் செயற்பாடுகள், சிவில் பாதுகாப்புப் படையினரால் முன்னெடுக்கப்பட்டுள்ளன.

* நாட்டில் இதுவரையில் 13,929 பேர் கொரோனா வைரஸ் தொற்றுக்கு உள்ளாகியுள்ளனர்.  * 35 மரணித்துள்ளனர். 

* நாட்டில் கொரோனா வைரஸ் தொற்றில் இருந்து இதுவரையில் 8,880 பேர்  பூரணமாக குணமடைந்துள்ளனர் என  சுகாதார அமைச்சு தெரிவித்துள்ளது.

* அதேவேளை, 5,014 பேர் தொடர்ந்தும் சிகிச்சை பெற்று வருகின்றனர்.