புத்தாண்டு பலகார மேசைச் செலவு: 7% அதிகரிப்பு

தமிழ் - சிங்கள புத்தாண்டிற்கான பாரம்பரிய "கெவிலி" (பலகார) மேசையைத் தயாரிப்பதற்குத் தேவையான பொருட்களின் செலவு, 2025ஆம் ஆண்டுடன் ஒப்பிடுகையில் 2026இல் 7.0% ஆல் அதிகரித்துள்ளது. இது கொரோனா பெருந்தொற்றுக் காலப்பகுதி மற்றும் பொருளாதார நெருக்கடிக்கு முன்னரான 2019ஆம் ஆண்டுடன் ஒப்பிடுகையில் 2.5 மடங்கு அதிகமாகும்.

வெரிட்டே ரிசர்ச் (Verité Research) நிறுவனத்தினால் நிர்வகிக்கப்படும் இலங்கையின் முன்னணி பொருளாதார ஆய்வுத் தளமான PublicFinance.lk வெளியிட்ட வருடாந்த "அவுருது" பலகாரங்களுக்கான செலவு மதிப்பீட்டில் இந்தத் தகவல்கள் வெளியாகியுள்ளன.

விலை அதிகரிப்பிற்கான முக்கிய காரணங்கள்

பலகார மேசையில் உள்ள எட்டு முக்கிய பொருட்களில் ஆறின் விலைகள் அதிகரித்துள்ளன. 2026இல் ஏற்பட்ட 7.0% செலவு அதிகரிப்பிற்கு முக்கியமாகத் தேங்காய் எண்ணெய் மற்றும் அரிசி மாவின் விலை உயர்வே காரணமாகும். மொத்த அதிகரிப்பில் சுமார் 80% பங்களிப்பிற்கு இவை இரண்டும் மட்டுமே காரணமாக அமைந்துள்ளன.

பாரம்பரிய பலகார மேசை

இலங்கையின் புத்தாண்டு கொண்டாட்டங்களின் ஒரு பாரம்பரிய அம்சமாக விளங்கும் கெவிலி (பலகார) மேசையானது, செழுமையையும் மகிழ்ச்சியையும் குறிக்கும் பல்வேறு இனிப்பு வகைகளை உள்ளடக்கியதாகும். வீட்டுக்கு வீடு இது மாறுபடலாம் என்றாலும், பொதுவான மதிப்பீட்டில் பின்வருவன அடங்கும்:

பால் சோறு,கொக்கிஸ்,வாழைப்பழம், அலுவா, கொண்டைப் பணியாரம்,தொதல், பயத்தம் பணியாரம், பட்டர் கேக்,

ஆய்வு முறைமை

இந்த ஆய்வு நான்கு முதல் ஐந்து பேரைக் கொண்ட ஒரு குடும்பத்திற்குத் தேவையான அளவீடுகளுடன், 'அப்பே அம்மா' (Appe Amma) எனும் பிரபலமான யூடியூப் (YouTube) தளத்தின் சமையல் குறிப்புகளை அடிப்படையாகக் கொண்டு மேற்கொள்ளப்பட்டுள்ளது. இதில் பிரதான பொருட்களின் விலைகள் மட்டுமே கணக்கில் கொள்ளப்பட்டுள்ளன; மின்சாரம், எரிவாயு மற்றும் மசாலாப் பொருட்களுக்கான செலவுகள் இதில் சேர்க்கப்படவில்லை.

இதற்கான விலை விபரங்கள் தொகைமதிப்பு மற்றும் புள்ளிவிபரத் திணைக்களத்திடமிருந்து பெறப்பட்டுள்ளன. 2019 (ஏப்ரல் 1வது வாரம்), 2025 (மார்ச் 3வது வாரம்) மற்றும் 2026 (மார்ச் 4வது வாரம்) ஆகிய காலப்பகுதிகளில் கொழும்பு மாவட்டத்தில் நிலவிய வெளிச்சந்தை வாராந்த சராசரி சில்லறை விலைகள் இந்த மதிப்பீட்டிற்குப் பயன்படுத்தப்பட்டுள்ளன.