மோடியை வறுத்தெடுத்த பெண் செய்தியாளர்

பிரதமர் நரேந்திர மோடியின் நோர்வே பயணத்தை செய்தி சேகரிக்கச் சென்ற ஊடகவியலாளர்களில் ஹெல் லீங்கும் (Helle Lyng) ஒருவர். செய்தியாளர் சந்திப்பில் பிரதமர் மோடியிடம் கேள்வி கேட்க முயன்றதற்காக, அவர் சமூக வலைத்தளங்களில் கடுமையான ஆன்லைன் மிரட்டல்களுக்கும், கேலிகளுக்கும் உள்ளாகி வருகிறார்.

நோர்வே நாட்டுக்கு வருகை தந்த இந்தியப் பிரதமர் நரேந்திர மோடியிடம், நோர்வே பெண் செய்தியாளர் ஒருவர் கேள்வி கேட்க முயன்று தோல்வியடைந்தார். அவர் ஒரு முக்கியச் செய்தியை   உலகிற்குச் சொல்லவே முயன்றார்; ஆனால், எதிர்பாராதவிதமாக அவரே ஒரு முக்கியச் செய்தியாக மாறிவிட்டார்!

பிரதமர் மோடி தனது ஐந்து நாடுகள் பயணத்தின் நான்காவது கட்டமாக நோர்வே நாட்டிற்குச் சென்றிருந்தார். ஐக்கிய அரபு அமீரகம், நெதர்லாந்து மற்றும் ஸ்வீடன் ஆகிய நாடுகளுக்குச் சென்ற பிறகு, அவர் ஓஸ்லோ நகரை வந்தடைந்தார். அங்கிருந்து மே 19 அன்று பிற்பகலில் இத்தாலிக்குச் செல்ல அவர் திட்டமிட்டிருந்தார்.

"பிரதமர் மோடி அவர்களே, நீங்கள் ஏன் கேள்விகளை எதிர்கொள்வதில்லை?" ஓஸ்லோ நகரில் நோர்வே பிரதமர் ஜோனாஸ் கர் ஸ்டோருடன் இணைந்து பிரதமர் மோடி நடத்திய கூட்டு ஊடகச் சந்திப்பின்போது இந்தச் சர்ச்சை தொடங்கியது.

தலைவர்கள் இருவரும் மேடையை விட்டு வெளியேறியபோது, ஹெல் லீங் உரத்த குரலில், "பிரதமர் மோடி அவர்களே, உலகின் மிகச் சுதந்திரமான ஊடகங்களிடமிருந்து சில கேள்விகளை நீங்கள் ஏன் எதிர்கொள்ளக் கூடாது?" என்று வினவினார். ஆனால், இரு தலைவர்களும் அதற்குப் பதிலளிக்காமல் கடந்து சென்றனர்.

பின்னர் இந்த நிகழ்வின் வீடியோவை எக்ஸ் (X) தளத்தில் பகிர்ந்த லீங், "இந்தியப் பிரதமர் நரேந்திர மோடி எனது கேள்விக்குப் பதிலளிக்கவில்லை; அவர் பதிலளிப்பார் என்று நான் எதிர்பார்க்கவும் இல்லை" என்று குறிப்பிட்டிருந்தார்.

மேலும் அவர், "உலகப் பத்திரிகை சுதந்திரக் குறியீட்டில்   நோர்வே முதலிடத்தில் உள்ளது; ஆனால் இந்தியாவோ பாலஸ்தீனம், அமீரகம் மற்றும் கியூபா ஆகிய நாடுகளுடன் போட்டியிட்டு 157-வது இடத்தில் உள்ளது. நாம் கூட்டுறவு வைத்துள்ள அதிகார மையங்களைக் கேள்வி கேட்பது நமது கடமையாகும்" என்றும் பதிவிட்டிருந்தார்.

இதனைத் தொடர்ந்து, நோர்வேயிலுள்ள இந்தியத் தூதரகம், இந்திய வெளியுறவுத் துறையின் செய்தியாளர் சந்திப்பில் கலந்துகொள்ளுமாறு லீங்கிற்கு அழைப்பு விடுத்தது. அதற்கு அவர், "என்னால் மோடியை நேர்காணல் செய்ய முடியுமா?" என்று எக்ஸ் தளத்தில் இந்தியத் தூதரகத்திடம் கேள்வி எழுப்பினார்.

இந்திய வெளியுறவு அமைச்சகத்துடன் (MEA) நோர்வே செய்தியாளரின் காரசார விவாதம்: இந்திய வெளியுறவு அமைச்சகத்தின் செய்தியாளர் சந்திப்பின்போது இந்த விவகாரம் மேலும் தீவிரமடைந்தது. அங்கு லீங் மீண்டும் இந்தியாவின் மனித உரிமைகள், ஜனநாயகம் மற்றும் ஊடக சுதந்திரம் குறித்த கேள்விகளை எழுப்பினார்.

"சர்வதேச சமூகம் ஏன் இந்தியாவை 'நம்ப' வேண்டும்? பத்திரிகையாளர்களின் 'விமர்சன ரீதியான கேள்விகளை' மோடி எப்போது எதிர்கொள்ளத் தொடங்குவார்?" என்று இந்திய அதிகாரிகளிடம் அவர் கேள்வி எழுப்பினார். மேலும், "உங்கள் நாட்டில் நடக்கும் மனித உரிமை மீறல்களை நிறுத்துவதாக உங்களால் உறுதியளிக்க முடியுமா?" என்றும் அவர் கேட்டார்.

இதற்கு இந்திய வெளியுறவு அமைச்சகத்தின் (மேற்கு) செயலாளர் சிபி ஜார்ஜ், இந்தியாவின் ஜனநாயகக் கட்டமைப்புகளைத் தீவிரமாகப் பாதுகாத்துப் பேசினார். இந்தியாவின் பரப்பளவு மற்றும் பன்முகத்தன்மையைச் சரியாகப் புரிந்து கொள்ளாமல், "அறிவற்ற சில தொண்டு நிறுவனங்களின் (NGOs)" தேர்ந்தெடுக்கப்பட்ட அறிக்கைகளை மட்டுமே நம்பியிருக்கும் வெளிநாட்டு விமர்சகர்களை அவர் கடுமையாக விமர்சித்தார்.

வெளிப்படையான அதிருப்தியுடன் பேசிய சிபி ஜார்ஜ், "ஒரு நாடு ஏன் இந்தியாவை நம்ப வேண்டும் என்று கேட்டீர்கள், அதற்கான பதிலை நான் சொல்கிறேன். இந்தியா உலகிற்குத் தனித்துவமான பல விஷயங்களை வழங்கிய ஒரு நாகரிக நாடு. கொரோனா பெருந்தொற்றின்போது ஒட்டுமொத்த உலகமும் துயரப்பட்டது, அப்போது நாம் என்ன செய்தோம்? நாம் ஒரு குகைக்குள் ஒளிந்துகொள்ளவில்லை; எங்களால் உலகைக் காப்பாற்ற முடியாது என்றும் கூறவில்லை. உலகிற்கு உதவிக் கரங்களை நீட்டினோம். அதுதான் நம்பிக்கையை உருவாக்குகிறது. அந்த நம்பிக்கையை உலகம் மதிக்கிறது என்பதில் நாங்கள் மகிழ்ச்சியடைகிறோம்" என்று பதிலடி கொடுத்தார்.

பின்னர் இதுகுறித்து எக்ஸ் தளத்தில் பதிவிட்ட லீங், "இந்தியாவில் நடக்கும் மனித உரிமை மீறல்களைக் கருத்தில் கொண்டு நாம் ஏன் இந்தியாவை நம்ப வேண்டும் என்பது குறித்தும், இந்த அரசுமுறைப் பயணம் குறித்தும் எனது சக ஊழியரும் நானும் இன்று இரவு கேள்விகளை எழுப்பினோம். மனித உரிமைகள் குறித்து அவர்களைக் குறிப்பிட்டுக் பேச வைக்க நான் பலமுறை முயன்றேன், ஆனால் என்னால் முடியவில்லை. பிரதிநிதிகள் இந்தியாவின் கொரோனா கால முயற்சிகள் மற்றும் யோகா போன்றவற்றைப் பற்றியே அதிகம் பேசினர்" என்று தன் அதிருப்தியைப் பதிவு செய்துள்ளார்.