அவுஸ்திரேலிய தொடரிலிருந்து அன்டர்சன் அவுட்

கடந்த ஜூன் மாதம் நடைபெற்ற இங்கிலாந்துக்கு எதிரான தொடரின்போது முதுகுப் பகுதியில் உபாதைக்குள்ளான கொரே அன்டர்சன், அந்தத் தொடரில் தொடர்ந்தும் பங்குபற்றமுடியாமல் நாடு திரும்பியிருந்தார். 

 

அதனைத் தொடர்ந்து நடைபெற்ற தென்னாபிரிக்க அணியுடனான மட்டுப்படுத்தப்பட்ட ஓவர்கள் கொண்ட தொடரிலும் அவரால் பங்குபற்றமுடிந்திருக்கவில்லை. 

 

இந்த நிலையில், அடுத்த மாத ஆரம்பத்தில் நடைபெறவுள்ள அவுஸ்திரேலிய அணிக்கு எதிரான டெஸ்ட் தொடரில் விளையாடவிருக்கும் அணியில் கொரே அன்டர்சனின் பெயர் இணைக்கப்பட்டிருந்தது. 

 

ஆயினும், உடல் உபாதையிலிருந்து குணமாக அவருக்கு போதிய அவகாசம் வழங்கும் அவசியமிருப்பதால், தொடர்ந்தும் அவருக்கு ஓய்வினை வழங்கியுள்ளதாக நியூசிலாந்து கிரிக்கெட் சபை அறிவித்துள்ளது.  இதுவரை 11 டெஸ்ட் போட்டிகளில் விளையாடியிருக்கும் கொரே அன்டர்சன், ஒரு சதம் மூன்று அரைச் சதங்கள் உள்ளடங்கலாக 31.35 என்ற சராசரியில் 533 ஓட்டங்களை எடுத்திருப்பதோடு, 13 விக்கெட்டுக்களையும் வீழ்த்தியுள்ளார்.

 

கொரே அன்டர்சனுக்குப் பதிலாக இதுவரை டெஸ்ட் அறிமுகத்தை மேற்கொண்டிராத 23 வயதான சகலதுறை வீரர் மிச்செல் சன்ட்னர் அணிக்குள் உள்வாங்கப்பட்டுள்ளார்.