சம்பியனானார் ஜோக்கோவிக்

உலகின் முதல்நிலை வீரரான சேர்பியாவின் நோவாக் ஜோக்கோவிக்குக்கும் , தரவரிசையில் பதினாறாம் இடம் வகிக்கும் பிரான்ஸின் ஜோ-வில்பிரைட்டு சொங்காவுக்குமிடையிலான ஷங்காய் ரொலெக்ஸ் மாஸ்ட்டேர்ஸ் ஆண்களுக்கான இறுதிப்போட்டியில் ஜோகோவிக் 6-2, 6-4 என்ற செட் கணக்கில் வெற்றிபெற்றுள்ளார்.

முதலாவது செட்டை ஜோக்கோவிக் இலகுவாக கைப்பற்றியிருந்தபோதும், இரண்டாவது செட்டில் சொங்கா ஓரளவு போராட்டத்தை வெளிப்படுத்தியிருந்தபோதும், அதையும் ஜோகோவிக் கைப்பற்ற போட்டி ஒரு மணித்தியாலம் 18 நிமிடங்களில் முடிவுக்கு வந்தது.

இது ஜோக்கோவிக்குக்கு மூன்றாவது ஷங்காய் மாஸ்ட்டேர்ஸ் பட்டம் என்பதுடன், இப்பருவகாலத்தில் அவரது ஒன்பதாவது பட்டம் ஆகும். தவிர சீனாவில் மட்டும் அவர் கைப்பற்றும் பத்தாவது பட்டம் ஆகும். இதன் மூலம் ஆண்கள் பிரிவின், அவரது தெளிவான ஆதிக்கம் வெளிப்படுகிறது.

இதில் தனது அரையிறுதிப்போட்டியில்  ஜோக்கோவிக், தரவரிசையில் மூன்றாமிடத்தில் இருந்த பிரித்தானியாவின் அன்டி மரேயைத் 6-1,6-3 என்ற செட் கணக்கில் தோற்கடித்து இறுதிப்போட்டிக்கும், அதேவேளை தரவரிசையில் எட்டாம் இடத்திலிருந்த ஸ்பெயினின் ரஃபேல் நடாலைத் தோற்கடித்து சொங்காவும் இறுதிப்போட்டிக்கு முன்னேறியிருந்தனர்.