இங்கிலாந்து பிறீமியர் லீக்: பலஸிடம் தோற்ற சிற்றி

இங்கிலாந்து கால்பந்தாட்டக் கழகங்களுக்கிடையிலான பிறீமியர் லீக் தொடரில், நடப்புச் சம்பியன்களான மன்செஸ்டர் சிற்றியின் மைதானத்தில் நேற்றிரவு நடைபெற்ற அவ்வணியுடனான போட்டியில் 2-0 என்ற கோல் கணக்கில் கிறிஸ்டல் பலஸ் வென்றது.

பலஸ் சார்பாக, வில்ஃபிரைட் ஸாகா, கொனர் கல்லக்ஹர் ஆகியோர் தலா ஒவ்வொரு கோலைப் பெற்றனர்.

இந்நிலையில், டொட்டென்ஹாம் ஹொட்ஸ்பரின் மைதானத்தில் நடைபெற்ற அவ்வணியுடனான போட்டியில் 3-0 என்ற கோல் கணக்கில் மன்செஸ்டர் யுனைட்டெட் வென்றது. யுனைட்டெட் சார்பாக, கிறிஸ்டியானோ ரொனால்டோ, எடின்சன் கவானி, மார்க்கஸ் றஷ்ஃபோர்ட் ஆகியோர் தலா ஒவ்வொரு கோலைப் பெற்றனர்.

இதேவேளை, லிவர்பூலின் மைதானத்தில் நடைபெற்ற அவ்வணியுடனான போட்டியானது 2-2 என்ற கோல் கணக்கில் சமநிலையில் முடிவடைந்தது. லிவர்பூல் சார்பாக, ஜோர்டான் ஹென்டர்சன், சாடியோ மனே ஆகியோர் தலா ஒவ்வொரு கோலைப் பெற்றதோடு, பிறைட்டன் சார்பாக, எனோச் மவப்பு, லியனார்டோ ட்ரோஸார்ட் ஆகியோர் தலா ஒவ்வொரு கோலைப் பெற்றனர்.

தவிர, லெய்செஸ்டரின் மைதானத்தில் நடைபெற்ற அவ்வணியுடனான போட்டியை 2-0 என்ற கோல் கணக்கில் ஆர்சனல் வென்றிருந்தது. ஆர்சனல் சார்பாக, கப்ரியல், எமிலி ஸ்மித் றோவே ஆகியோர் தலா ஒவ்வொரு கோலைப் பெற்றனர்.