இந்தியாவைத் தோற்கடித்தது நியூசிலாந்து

இந்தியா, நியூசிலாந்து அணிகளுக்கிடையிலான ஐந்து போட்டிகள் கொண்ட ஒருநாள் சர்வதேசப் போட்டித் தொடரில், டெல்லி பெரோஷா கோட்லா மைதானத்தில் இடம்பெற்ற இரண்டாவது போட்டியில், இந்தியாவை, நியூசிலாந்து தோற்கடித்தது.

நாணயச் சுழற்சியில் வெற்றி பெற்ற இந்திய அணித்தலைவர் மகேந்திர சிங் டோணி, நியூசிலாந்து அணியை முதலில் துடுப்பெடுத்தாடப் பணித்தார். அந்தவகையில், முதலில் துடுப்பெடுத்தாடிய நியூசிலாந்து அணி, 50 ஓவர்களில் ஒன்பது விக்கெட்டுகளை இழந்து 242 ஓட்டங்களைப் பெற்றது. துடுப்பாட்டத்தில், அணித்தலைவர் கேன் வில்லியம்ஸன் 118, டொம் லதாம் 46 ஓட்டங்களைப் பெற்றனர். பந்துவீச்சில், ஜஸ்பிரிட் பும்ரா, அமித் மிஷ்ரா ஆகியோர் தலா மூன்று விக்கெட்டுகளினைக் கைப்பற்றினர்.

பதிலுக்கு  243 ஓட்டங்களை வெற்றியிலக்காகக் கொண்டு துடுப்பெடுத்தாடிய இந்திய அணி, 49.3 ஓவர்களில் சகல விக்கெட்டுகளையும் இழந்து 236 ஓட்டங்களையே பெற்று, ஆறு ஓட்டங்களினால் தோல்வியடைந்தது. துடுப்பாட்டத்தில், கேதார் யாதவ் 41, மகேந்திர சிங் டோணி39, ஹர்டிக் பாண்ட்யா 36, அஜிங்கியா ரஹானே 28 ஓட்டங்களைப் பெற்றனர். பந்துவீச்சில், டிம் சௌதி மூன்று, ட்ரெண்ட் போல்ட், மார்ட்டின் கப்தில் ஆகியோர் தலா இரண்டு விக்கெட்டுகளைக் கைப்பற்றினர்.

போட்டியின் நாயகனாக, கேன் வில்லியம்ஸன் தெரிவானார்.