இரண்டாமிடத்தில் ரோகித்; மூன்றாமிடத்தில் குல்தீப்

சர்வதேச கிரிக்கெட் சபையின் ஒருநாள் சர்வதேசப் போட்டிகளுக்கான துடுப்பாட்ட வீரர்களுக்கான தரவரிசையில் இந்திய அணியின் ஆரம்பத் துடுப்பாட்ட வீரர் ரோகித் ஷர்மா இரண்டு இடங்கள் முன்னேறி இரண்டாமிடத்தைப் பிடித்துள்ளார்.

நடந்து முடிந்த ஆசியக் கிண்ணத்தைத் தொடர்ந்து வெளியிடப்பட்ட குறித்த தரப்படுத்தல்களில், ஆசியக் கிண்ணத்தில் 105.66 என்ற சராசரியில் 317 ஓட்டங்களைப் பெற்றதைத் தொடர்ந்தே நான்காமிடத்திலிருந்த ரோகித் இரண்டு இடங்கள் முன்னேறி இரண்டாமிடத்தைப் பிடித்துள்ளார்.

இதேவேளை, குறித்த ஆசியக் கிண்ணத்தில் 342 ஓட்டங்களைப் பெற்ற ரோகித் ஷர்மாவின் சக ஆரம்பத் துடுப்பாட்ட வீரர் ஷீகர் தவான், ஒன்பதாமிடத்திலிருந்து நான்கு இடங்கள் முன்னேறி ஐந்தாமிடத்தைப் பிடித்துள்ளார்.

முதல் 10 துடுப்பாட்ட வீரர்களின் தரவரிசை பின்வருமாறு,

1. விராத் கோலி, 2. ரோகித் ஷர்மா, 3. ஜோ றூட், 4. டேவிட் வோணர், 5. ஷீகர் தவான், 6. பாபர் அஸாம், 7. றொஸ் டெய்லர், 8. குயின்டன் டி கொக், 9. கேன் வில்லியம்சன், 10. ஜொனி பெயார்ஸ்டோ.

இதேவேளை, பந்துவீச்சாளர்களுக்கான தரவரிசையில், ஆசியக் கிண்ணத்தில் 10 விக்கெட்டுகளைக் கைப்பற்றிய இந்திய அணியின் சுழற்பந்துவீச்சாளர் குல்தீப் யாதவ், ஆறாமிடத்திலிருந்து மூன்று இடங்கள் முன்னேறி மூன்றாமிடத்தைப் பிடித்துள்ளார். இதுதவிர, ஆசியக் கிண்ணத்தில் ஏழு விக்கெட்டுகளைக் கைப்பற்றிய ஆப்கானிஸ்தானின் சுழற்பந்துவீச்சாளர் முஜீப் உர் ரஹ்மான் 15 இடங்கள் முன்னேறி எட்டாமிடத்தைப் பிடித்துள்ளார்.

முதல் 10 பந்துவீச்சாளர்களின் தரவரிசை பின்வருமாறு,

1. ஜஸ்பிரிட் பும்ரா, 2. ரஷீட் கான், 3. குல்தீப் யாதவ், 4. ட்ரெண்ட் போல்ட், 5. ஜொஷ் ஹேசில்வூட், 6. ஹசன் அலி, 7. அடில் ரஷீட், 8. முஜீப் உர் ரஹ்மான், கஜிஸோ றபாடா, 10. இம்ரான் தாஹீர்.

இந்நிலையில், ஆசியக் கிண்ணத்தில் 10 விக்கெட்டுகளைக் கைப்பற்றியதோடு, 43.50 என்ற சராசரியில் 87 ஓட்டங்களைப் பெற்ற ஆப்கானிஸ்தானின் ரஷீட் கான், சகலதுறை வீரர்களுக்கான தரவரிசையில் ஆறு இடங்கள் முன்னேறி முதலாமிடத்தைப் பிடித்ததுடன் அவரின் சக வீரரான மொஹமட் நபி 134 ஓட்டங்களைப் பெற்றதுடன், ஐந்து விக்கெட்டுகளைக் கைப்பற்றி ஒரு இடம் முன்னேறி மூன்றாமிடத்தைப் பிடித்துள்ளார்.

முதல் ஐந்து சகலதுறை வீரர்கள் பின்வருமாறு,

1. ரஷீட் கான், 2. ஷகிப் அல் ஹஸன், 3. மொஹமட் நபி, 4. மிற்செல் சான்ட்னெர், 5. மொஹமட் ஹபீஸ்.