இரண்டாமிடத்துக்கு முன்னேறிய ஸாம்பா

சர்வதேச கிரிக்கெட் சபையின் ஒருநாள் சர்வதேசப் போட்டிகளுக்கான பந்துவீச்சாளர்களின் தரவரிசையில் இரண்டாமிடத்துக்கு அவுஸ்திரேலியாவின் சுழற்பந்துவீச்சாளர் அடம் ஸாம்பா முன்னேறியுள்ளார்.

இங்கிலாந்துக்கெதிரான முதலிரண்டு போட்டிகளிலும் 4 விக்கெட்டுகளைக் கைப்பற்றியதைத் தொடர்ந்தே, மூன்றாமிடத்திலிருந்து ஓரிடம் முன்னேறி இரண்டாமிடத்தை ஸாம்பா அடைந்துள்ளார்.

இதேவேளை தென்னாபிரிக்காவுக்கெதிரான முதலிரண்டு போட்டிகளிலும் 7 விக்கெட்டுகளைக் கைப்பற்றிய ஆப்கானிஸ்தானின் சுழற்பந்துவீச்சாளர் ரஷீட் கான், 11ஆம் இடத்திலிருந்து எட்டு இடங்கள் முன்னேறி மூன்றாமிடத்தையடைந்துள்ளார்.

முதல் 10 பந்துவீச்சாளர்களின் தரவரிசை பின்வருமாறு,

1. கேஷவ் மஹராஜ், 2. அடம் ஸாம்பா, 3. ரஷீட் கான், 4. குல்தீப் யாதவ், 5. ஜொஷ் ஹேசில்வூட், 6. ஷகீன் ஷா அஃப்ரிடி, பெர்னார்ட் ஸ்கொல்ட்ஸ், 8. ஜஸ்பிரிட் பும்ரா, 9. ட்ரெண்ட் போல்ட், மொஹமட் சிராஜ்.

தென்னாபிரிக்காவுக்கெதிரான மூன்று போட்டிகளிலும் 194 ஓட்டங்களைப் பெற்ற ஆப்கானிஸ்தானின் ரஹ்மனுல்லாஹ் குர்பாஸ், துடுப்பாட்டவீரர்களின் தரவரிசையில் 18ஆம் இடத்திலிருந்து 10 இடங்கள் முன்னேறி எட்டாமிடத்தையடைந்துள்ளார்.

இதேவேளை இங்கிலாந்துக்கெதிரான முதலிரண்டு போட்டிகளிலும் 183 ஓட்டங்களைப் பெற்ற அவுஸ்திரேலியாவின் ட்ரெவிஸ் ஹெட், 16ஆம் இடத்திலிருந்து ஏழு இடங்கள் முன்னேறி ஒன்பதாமிடத்தையடைந்துள்ளார்.

முதல் 10 துடுப்பாட்டவீரர்களின் தரவரிசை பின்வருமாறு,

1. பாபர் அஸாம், 2. றோஹித் ஷர்மா, 3. ஷுப்மன் கில், 4. விராட் கோலி, ஹரி டெக்டர், 6. டரைல் மிற்செல், 7. பதும் நிஸங்க, 8. ரஹ்மனுல்லாஹ் குர்பாஸ், 9. ட்ரெவிஸ் ஹெட், 10. பக்கர் ஸமன்.

இந்நிலையில் சகலதுறைவீரர்களுக்கான தரவரிசையில் ஐந்தாமிடத்திலிருந்து ஓரிடம் முன்னேறி நான்காமிடத்தை ரஷீட் கான் அடைந்துள்ளார். தவிர, இங்கிலாந்துக்கெதிரான இரண்டாவது போட்டியில் 2 விக்கெட்டுகளைக் கைப்பற்றியதோடு மூன்றாவது போட்டியில் 30 ஓட்டங்களைப் பெற்ற அவுஸ்திரேலியாவின் கிளென் மக்ஸ்வெல், ஆறாமிடத்திலிருந்து ஓரிடம் முன்னேறி ஐந்தாமிடத்தையடைந்துள்ளார்.

முதல் ஐந்து சகலதுறைவீரர்களின் தரவரிசை பின்வருமாறு,

1. மொஹமட் நபி, 2. ஷகிப் அல் ஹஸன், 3. சிகண்டர் ராசா, 4. ரஷீட் கான், 5. கிளென் மக்ஸ்வெல்.

இதேவேளை பங்களாதேஷுக்கெதிரான முதலாவது டெஸ்டில் 5 விக்கெட்டுகளைக் கைப்பற்றிய இந்தியாவின் இரவீந்திர ஜடேஜா, பந்துவீச்சாளர்களின் தரவரிசையில் ஏழாமிடத்திலிருந்து ஓரிடம் முன்னேறி ஆறாமிடத்தையடைந்துள்ளார்.

தவிர, நியூசிலாந்துக்கெதிரான முதலாவது டெஸ்டில் 9 விக்கெட்டுகளைக் கைப்பற்றிய இலங்கையின் சுழற்பந்துவீச்சாளர் பிரபாத் ஜெயசூரிய, 13ஆம் இடத்திலிருந்து ஐந்து இடங்கள் முன்னேறி எட்டாமிடத்தையடைந்துள்ளார்.

முதல் 10 பந்துவீச்சாளர்களின் தரவரிசை பின்வருமாறு,

1. இரவிச்சந்திரன் அஷ்வின், 2. ஜஸ்பிரிட் பும்ரா, 3. ஜொஷ் ஹேசில்வூட், 4. பற் கமின்ஸ், ககிஸோ றபாடா, 6. இரவீந்திர ஜடேஜா, 7. நேதன் லையன், 8. பிரபாத் ஜெயசூரிய, 9. கைல் ஜேமிஸன், 10. ஷகீன் ஷா அஃப்ரிடி.

இந்நிலையில் பங்களாதேஷுக்கெதிரான போட்டியில் 66 ஓட்டங்களைப் பெற்ற இந்தியாவின் யஷஸ்வி ஜைஸ்வால், துடுப்பாட்டவீரர்களின் தரவரிசையில் ஆறாமிடத்திலிருந்து ஓரிடம் முன்னேறி ஐந்தாமிடத்தையடைந்துள்ளார். இப்போட்டியில் 148 ஓட்டங்களைப் பெற்ற இந்தியாவின் றிஷப் பண்ட் ஆறாமிடத்தில் தரவரிசையில் மீள நுழைந்துள்ளார்.

முதல் 10 துடுப்பாட்டவீரர்களின் தரவரிசை பின்வருமாறு,

1. ஜோ றூட், 2. கேன் வில்லியம்சன், 3. டரைல் மிற்செல், 4. ஸ்டீவ் ஸ்மித், 5. யஷஸ்வி ஜைஸ்வால், 6. றிஷப் பண்ட், 7. உஸ்மான் கவாஜா, 8. மொஹமட் றிஸ்வான், மர்னுஸ் லபுஷைன், 10. றோஹித் ஷர்மா.

முதல் ஐந்து சகலதுறைவீரர்களின் தரவரிசை பின்வருமாறு,

1. இரவீந்திர ஜடேஜா, 2. இரவிச்சந்திரன் அஷ்வின், 3. ஷகிப் அல் ஹஸன், 4. ஜோ றூட், 5. ஜேஸன் ஹோல்டர்.