ஏழாமிடத்துக்கு முன்னேறினார் லையன்

சர்வதேச கிரிக்கெட் சபையின் டெஸ்ட் போட்டிகளுக்கான பந்துவீச்சாளர்களின் தரவரிசையில் ஏழாமிடத்துக்கு, அவுஸ்திரேலிய அணியின் சுழற்பந்துவீச்சாளர் நேதன் லையன் முன்னேறியுள்ளார்.

முடிவுற்ற இந்தியாவுடனான இரண்டாவது டெஸ்டில் 8 விக்கெட்டுகளைக் கைப்பற்றியதன் மூலமே 14ஆம் இடத்திலிருந்து ஏழு இடங்கள் முன்னேறிய லையன், ஏழாமிடத்தைப் பிடித்துள்ளார்.

இதேவேளை, குறித்த போட்டியில் நான்கு விக்கெட்டுகளைக் கைப்பற்றிய அவுஸ்திரேலிய அணியின் வேகப்பந்துவீச்சாளர் ஜொஷ் ஹேசில்வூட், 11ஆம் இடத்திலிருந்து இரண்டு இடங்கள் முன்னேறி ஒன்பதாமிடத்தைப் பிடித்துள்ளார்.

அந்தவகையில், முதல் 10 பந்துவீச்சாளர்களில் இந்த இரண்டு மாற்றங்கள் தவிர, ஏழாமிடத்திலிருந்து அவுஸ்திரேலிய அணியின் வேகப்பந்துவீச்சாளர் பற் கமின்ஸ், ஓரிடம் கீழிறங்கி எட்டாமிடத்தில் காணப்படுவதுடன், ஒன்பதாமிடத்திலிருந்த யசீர் ஷா ஓரிடம் கீழிறங்கி பத்தாமிடத்தில் காணப்படுகின்றார்.

முதல் 10 பந்துவீச்சாளர்களின் தரவரிசை பின்வருமாறு,

1. கஜிஸோ றபாடா, 2. ஜேம்ஸ் அன்டர்சன், 3. வேர்ணன் பிலாந்தர், 4. மொஹமட் அப்பாஸ், 5. இரவீந்திர ஜடேஜா, 6. இரவிச்சந்திரன் அஷ்வின், 7. நேதன் லையன், 8.  பற் கமின்ஸ், 9. ஜொஷ் ஹேசில்வூட், 10. யசீர் ஷா.

இந்நிலையில், முதல் 10 துடுப்பாட்ட வீரர்களின் தரவரிசையில் மாற்றமெதுவும் ஏற்படாத நிலையில், அவுஸ்திரேலியாவுக்கெதிரான இரண்டாவது டெஸ்டில் சதம் பெற்றதன் மூலம் தனது புள்ளிகளை முதலாமிடத்திலுள்ள இந்திய அணியின் தலைவர் விராத் கோலி உயர்த்தியுள்ளதோடு, அதேபோல இலங்கைக்கெதிரான முதலாவது டெஸ்டில் அரைச்சதம் பெற்றதன் மூலம் தனது புள்ளிகளை இரண்டாமிடத்திலுள்ள கேன் வில்லியம்சன் உயர்த்தியுள்ளார்.

அந்தவகையில், குறித்த போட்டிகளுக்கு முன்பாக ஏழாகக் காணப்பட்ட புள்ளிகள் வித்தியாசத்தை 19 ஆக கோலி அதிகரித்துள்ளார்.

முதல் 10 துடுப்பாட்ட வீரர்களின் தரவரிசை பின்வருமாறு,

1. விராத் கோலி, 2. கேன் வில்லியம்சன், 3. ஸ்டீவ் ஸ்மித், 4. செட்டேஸ்வர் புஜாரா, 5. ஜோ றூட், 6. டேவிட் வோணர், 7. திமுத் கருணாரத்ன, 8. டீன் எல்கர், 9. அஸார் அலி, ஹென்றி நிக்கொல்ஸ்

இந்நிலையில், நியூசிலாந்துக்கெதிரான முதலாவது டெஸ்டில் 83, ஆட்டமிழக்காமல் 120 ஓட்டங்களைப் பெற்ற இலங்கையணியின் முன்னாள் தலைவர் அஞ்சலோ மத்தியூஸ், 24ஆவது இடத்திலிருந்து எட்டு இடங்கள் முன்னேறி 16ஆம் இடத்தைப் பிடித்துள்ளார்.

இதேவேளை, குறித்த போட்டியின் இரண்டாவது இனிங்ஸில் ஆட்டமிழக்காமல் 141 ஓட்டங்களைப் பெற்ற குசல் மென்டிஸ், 20ஆம் இடத்திலிருந்து இரண்டு இடங்கள் முன்னேறி 18ஆம் இடத்தைப் பிடித்துள்ளார்.