காலிறுதியில் ஹலெப்

ஐக்கிய அமெரிக்காவின் கலிபோர்னியாவில் இடம்பெற்றுவரும் பி.என்.பி பரிபஸ் பகிரங்க டென்னிஸ் தொடரின் காலிறுதிப் போட்டிக்கு உலகின் முதலாம் நிலை வீராங்கனையான சிமோனா ஹலெப் முன்னேறியுள்ளார்.

றோமானியாவின் சிமோனா ஹலெப், தனது நான்காவது சுற்றுப் போட்டியில், 7-5, 6-1 என்ற நேர் செட்களில் சீனாவின் ஷியாங் வாங்கை வென்றே காலிறுதிப் போட்டிக்குத் தகுதிபெற்றார்.

இதேவேளை, உலகின் இரண்டாம் நிலை வீராங்கனையான டென்மார்க்கின் கரோலின் வொஸ்னியாக்கி, தனது நான்காவது சுற்றுப் போட்டியில் 4-6, 5-7 என்ற நேர் செட்களில் ரஷ்யாவின் டரியா கஸட்கினாவிடம் தோல்வியுற்று தொடரிலிருந்து வெளியேறினார்.

இந்நிலையில், உலகின் ஐந்தாம் நிலை வீராங்கனையான செக் குடியரசின் கரோலினா பிளிஸ்கோவா, தனது நான்காவது சுற்றுப் போட்டியில் 6-1, 7-6 (7-2) என்ற நேர் செட்களில் ஐக்கிய அமெரிக்காவின் அமன்டா அனிசிமோவாவை வென்று காலிறுதிப் போட்டிக்குத் தகுதிபெற்றார்.

இதேவேளை, உலகின் ஏழாம் நிலை வீராங்கனையான பிரான்ஸின் கரோலின் கர்சியா, தனது நான்காவது சுற்றுப் போட்டியில் 1-6, 1-6 என்ற நேர் செட்களில் உலகின் 10ஆம் நிலை வீராங்கனையான ஜேர்மனியின் அங்கெலிக் கேர்பரிடம் தோல்வியுற்று தொடரிலிருந்து வெளியேறினார்.

இந்நிலையில், உலகின் எட்டாம் நிலை வீராங்கனையான ஐக்கிய அமெரிக்காவின் வீனஸ் வில்லியம்ஸ், தனது நான்காவது சுற்றுப் போட்டியில் 7-6 (7-6), 6-4 என்ற நேர் செட்களில் லத்தீவியாவின் அனஸ்டாசிஜா செவஸ்டோவாவை வென்று காலிறுதிப் போட்டிக்குத் தகுதிபெற்றார்.

இதேவேளை, உலகின் மூன்றாம் நிலை வீரரான குரோஷியாவின் மரின் சிலிச், தனது மூன்றாவது சுற்றுப் போட்டியில், 4-6, 4-6 என்ற நேர் செட்களில் ஜேர்மனியின் பிலிப் கொஷ்னெய்டரிடம் தோற்று தொடரிலிருந்து வெளியேறினார்.

இந்நிலையில், உலகின் எட்டாம் நிலை வீரரான ஆர்ஜென்டீனாவின் ஜூவான் மார்ட்டின் டெல் போத்ரோ, தனது மூன்றாவது சுற்றுப் போட்டியில், 6-4, 7-6 (7-3) என்ற நேர் செட்களில் ஸ்பெய்னின் டேவிட் பெரரை வென்று நான்காவது சுற்றுப் போட்டிக்குத் தகுதிபெற்றார்.

இதேவேளை, உலகின் 10ஆம் நிலை வீரரான ஐக்கிய அமெரிக்காவின் ஜக் ஸ்டொக், தனது மூன்றாவது சுற்றுப் போட்டியில் 6-7 (6-7), 6-4, 4-6 என்ற செட் கணக்கில் ஸ்பெய்னின் பெலிசியானோ லொபேஸிடம் தோற்று தொடரிலிருந்து வெளியேறினார்.