தமிழ்நாட்டின் பந்துவீச்சுப் பயிற்றுநராக லக்ஷ்மிபதி பாலாஜி

2015-16 பருவகால ரஞ்சிக் கிண்ணப் போட்டிகளுக்கான தமிழ்நாடு அணியின் பந்துவீச்சுப் பயிற்றுநராக, அவ்வணியின் வீரர் லக்ஷ்மிபதி பாலாஜி தெரிவுசெய்யப்பட்டுள்ளார். எனினும், வீரராகவும் அவர் தொடர்ந்து விளையாடுவார் என அறிவிக்கப்படுகிறது.

கடந்த பருவகாலத்தில், 8 போட்டிகளில் மாத்திரம் பங்குபற்றிய லக்ஷ்மிபதி பாலாஜி, 15 விக்கெட்டுகளைக் கைப்பற்றியிருந்தார். இம்முறையும் கூட, அவ்வாறு, குறைந்த போட்டிகளில் மாத்திரமே அவர் பங்குபற்றுவார் எனத் தெரிவிக்கப்படுவதோடு, சில வேளைகளில் அவர் விளையாடாமல் போகக்கூடிய வாய்ப்புகளும் உள்ளதாகக் கருதப்படுகிறது.

33 வயதான லக்ஷ்மிபதி பாலாஜி, இந்தியாவுக்கான 8 டெஸ்ட், 30 ஒருநாள் சர்வதேசப் போட்டிகள், 5 இருபதுக்கு-20 சர்வதேசப் போட்டிகளில் பங்குபற்றியுள்ளதோடு, இறுதியாக 2012ஆம் ஆண்டில் இந்தியாவைப் பிரதிநிதித்துவப்படுத்தியிருந்தார்.