றியல் மட்ரிட் ஒப்பந்தத்தில் கைச்சாத்திட்ட மப்பே

ஸ்பானிய லா லிகா கால்பந்தாட்டக் கழகமான றியல் மட்ரிட்டில், தனது பிரெஞ்சு லீக் 1 கழகமான பரிஸ் ஸா ஜெர்மைனுடனான ஒப்பந்தம் இம்மாதம் 30ஆம் திகதி முடிவடையும்போது இணையும் ஒப்பந்தமொன்றில் கிலியான் மப்பே கைச்சாத்திட்டுள்ளார்.

வாய்மொழி ரீதியாக மட்ரிட்டில் இணைய இவ்வாண்டு பெப்ரவரியில் இணங்கியிருந்த 25 வயதான மப்பே, பருவகால முடிவில் பரிஸ் ஸா ஜெர்மைனிலிருந்து விலகவுள்ளதாக கடந்த மாதம் அறிவித்திருந்தார்.

எதிர்வரும் 2029ஆம் ஆண்டு வரையான ஒப்பந்தத்துக்கு மட்ரிட்டுடன் இணங்கியுள்ள மப்பே, பருவகாலமொன்றுக்கு 15 மில்லியன் யூரோக்களைப் பெறவுள்ளதுடன், மேலதிகமாக கைச்சாத்திடும் 150 மில்லியன் யூரோக்களையும் பெறவுள்ளார் என்பதோடு, தனது காப்புரிமைகளில் குறிப்பிட்ட சதவீதத்தை தான் வைத்துக் கொள்ளவுள்ளார்.