றோமாவை வீழ்த்திய இன்டர் மிலன்

இத்தாலியக் கால்பந்தாட்டக் கழகங்களுக்கிடையிலான சீரி ஏ தொடரில், சம்பியனான இன்டர் மிலனின் மைதானத்தில் இன்று அதிகாலை நடைபெற்ற அவ்வணிக்கும், றோமாவுக்குமிடையிலான போட்டியில், 3-1 என்ற கோல் கணக்கில் இன்டர் மிலன் வென்றது.

இன்டர் மிலன் சார்பாக, மார்செலோ பிறோஸோவிச், மத்தியாஸ் வெசினோ, றொமெலு லுக்காக்கு ஆகியோர் தலா ஒவ்வொரு கோலைப் பெற்றனர். றோமா சார்பாகப் பெறப்பட்ட கோலை ஹென்றிச் மிகித்திரயான் பெற்றிருந்தார்.

அந்தவகையில், சீரி ஏ புள்ளிகள் பட்டியலில், ஏற்கெனவே சம்பியனான இன்டர் மிலன் 88 புள்ளிகளுடன் முதலாமிடத்தில் காணப்படுகின்றது. 75 புள்ளிகளுடன் இரண்டாமிடத்தில் அத்லாண்டாவும், அதே புள்ளிகளுடன் கோலெண்ணிக்கை வித்தியாசம் காரணமாக மூன்றாமிடத்தில் ஏ.சி மிலனும், 73 புள்ளிகளுடன் நான்காமிடத்தில் நாப்போலியும் காணப்படுகின்றது.