புதையல் தோண்ட முற்பட்ட 10 பேர் கைது

-ஏ.எச்.ஏ.ஹுஸைன்

மட்டக்களப்பு, கரடியனாறுப் பொலிஸ் பிரிவுக்கு உட்பட்ட கொஸ்கொல்ல காட்டுப்பகுதியில் புதையல் தோண்டுவதற்கு முற்பட்ட குற்றச்சாட்;டின் பேரில் 10 பேர்; செவ்வாய்க்கிழமை (4) இரவு கைதுசெய்யப்பட்டுள்ளதாக தொல்பொருள் பாதுகாப்புப் பிரிவின் கிழக்கு மாகாணப் பொறுப்பதிகாரி நளின் வீரரத்ன தெரிவித்தார்.

மேற்படி காட்டுப்பகுதியில் புதையல் தோண்டும் நடவடிக்கைக்காக பூஜை, மந்திரம் போன்றவற்றில் ஈடுபட்டுக்கொண்டு   சிலர் நடமாடுவதாக கிராமவாசிகளிடமிருந்து தமக்குத் தகவல் கிடைத்தது. இதனை அடுத்து, அப்பகுதிக்குச் சென்று கண்காணிப்பில் ஈடுபட்டதாகவும் அவ்வேளையில் வான் ஒன்றில் வந்த  இச்சந்தேக நபர்கள் மடக்கிப் பிடிக்கப்பட்டதாகவும் அவர் கூறினார்.

இச்சந்தேக நபர்களிடமிருந்து பூஜைப் பொருட்கள், வான், திறப்புகள் என்பனவும் கைப்பற்றப்பட்டுள்ளதாகவும்  அவர் கூறினார்.

இச்சந்தேக நபர்கள் கண்டி, மஹியங்கனை,  மினிப்பே, பண்டாரவளை,  செங்கலடி, கோப்பாவெளி ஆகிய பிரதேசங்களைச் சேர்ந்தவர்கள் ஆவர். இவர்கள்  கரடியனாறுப் பொலிஸாரிடம் ஒப்படைக்கப்பட்டுள்ளனர் எனவும் அவர் கூறினார்.