இரதல்ல கீழ்ப்பிரிவில் 10 இலட்சம் ரூபாயில் கொங்கிரீட் பாதை

ஆ.ரமேஸ்

சப்பிரிகம எனும் வேலைத்திட்டத்தினூடாக, இரதல்ல கீழ்ப்பிரிவு தோட்டக் கோவிலுக்குச் செல்லும் பிரதான பாதையை, 10 இலட்சம் ரூபாய் செலவில் கொங்கிரீட் பாதையாக அமைத்துக் கொடுப்பதற்கு, நுவரெலியா பிரதேச சபை முன்வந்துள்ளது.

தோட்ட வீடமைப்பு மற்றும் சமுதாய உட்கட்டமைப்பு இராஜாங்க அமைச்சர் ஜீவன் தொண்டமானின் ஆலோசனைக்கமைய, நுவரெலியா பிரதேச சபை தவிசாளர் வேலு யோகராஜ், இதற்கான ஏற்பாடுகளை, இன்று (23) முன்னெடுத்தார்.

அதேநேரத்தில் நானுஒயா-இரதல்ல கீழ்ப் பிரிவு தோட்டத்தில், பொதுமக்கள் தினமும் பாவிக்கும் வீதிகளை புனரமைப்பு செய்வது தொடர்பில், அங்குள்ள இளைஞர்களுக்கும் பொதுமக்களுக்கும் இடையில் நீண்டகாலமாக முறுகல் நிலை தோன்றியுள்ளது.

இதைக் கருத்தில் கொண்டு, குறித்தத் தோட்டத்துக்கு நுவரெலியா பிரதேச சபை தவிசாளர் வேலு யோகராஜ் நேரில் சென்று, அங்குள்ள மக்களுடனும் இளைஞர்களுடன் சுமூகமான முறையில் கலந்துரையாடினார்.