மக்கள் பிரச்சினைகளைத் தீர்ப்பதற்கு ஜனாதிபதி கள விஜயம்

மக்கள் மத்தியில் சென்று அவர்கள் முகங்கொடுத்து வருகின்ற பல்வேறு பிரச்சினைகளை நேரடியாக இனங்கண்டு தாமதிக்காமல் தீர்வுகளை வழங்குவதற்காக, கிராமங்களுக்குச் செல்வதற்கு ஜனாதிபதி கோட்டாபய ராஜபக்‌ஷ திட்டமிட்டுள்ளார்.  

மக்கள் முகங்கொடுத்து வருகின்ற பிரச்சினைகளை,  நேரடியாகக் கண்டு அவர்களின் கவலைகளை கேட்டு சரியான தெளிவொன்றை பெற்று நிவாரணங்களை வழங்குவதே, ஜனாதிபதியின் எதிர்பார்ப்பாகும் எனத் தெரிவிக்கப்பட்டுள்ளது.  

பதுளை மாவட்டத்தின் ஹல்துமுல்லை பிரதேச செயலகப் பிரிவுக்கே, ஜனாதிபதி முதல் விஜயத்தை மேற்கொள்ளவுள்ளார். ஹப்புத்தளை 100 ஏக்கர் கிராமத்தில், குமாரதென்ன பாடசாலையில் வெள்ளிக்கிழமை (25) காலை 10.00 மணிக்கு முதல் சந்திப்பு இடம்பெறவுள்ளது. 

கிராமிய மக்கள், நீண்டகாலமாக தீர்த்து வைக்கப்படாத பொருளாதார மற்றும் சமூக பிரச்சினைகளால் அல்லல்பட்டு வருவதாகக் குறிப்பிட்ட ஜனாதிபதி, ஜனாதிபதி தேர்தல் மற்றும் பொதுத் தேர்தல் காலத்தில் நாடு முழுவதும் மேற்கொண்ட விஜயங்களின்போது அது தெளிவாகியதாகவும் குறிப்பிட்டார்.