யாழ். போதனா வைத்தியசாலைக்கு முன்பாக கஞ்சாவுடன் ஒருவர் கைது

யாழ்ப்பாணம் போதனா வைத்தியசாலைக்கு முன்பாக  கஞ்சா பொதியுடன் நின்றிருந்த ஒருவரை புதன்கிழமை (06) இரவு கைது செய்ததாக யாழ்ப்பாணப் பொலிஸார் தெரிவித்தனர்.

சந்தேகநபரிடமிருந்து 1 கிலோகிராம் கஞ்சா கைப்பற்றப்பட்டுள்ளது. சந்கேதநபர், இளவாலை பனிப்புலம் பகுதியில் கஞ்சாவை கொள்வனவு செய்து, கிளிநொச்சி உருத்திரபுரம் பகுதிக்கு கொண்டு செல்வதற்காக பஸ்ஸுக்காக காத்திருந்துள்ளார்.

மதுபோதையில் நின்றிருந்த சந்தேகநபர், சந்தேககத்துக்கு இடமான முறையில் இருப்பதை அவதானித்த பொலிஸார், அவரிடம் விசாரணை செய்த போது, அவரிடம் கஞ்சா இருந்தமை தெரியவந்தது. 

இதனையடுத்து அவரை பொலிஸார் கைது செய்துள்ளனர்.

அத்துடன், அவருக்கு கஞ்சா விற்பனை செய்தவர் தொடர்பில் இளவாலை பொலிஸாருடன் இணைந்து விசாரணைகளை மேற்கொள்வதாக யாழ்ப்பாணப் பொலிஸார் கூறினர்.